Azərbaycanda karqo şirkətləri ilə bağlı şikayətlərə EKSPERTDƏN AÇIQLAMA

Azərbaycanda kifayət qədər karqo xidməti göstərən firmalar, iri şirkətlər var. Vətəndaşlar bu karqo firmalarının köməyi ilə istədikləri ölkədən ehtiyac duyduğu məhsulu əldə edə bilirlər. Ölkədə çoxsaylı karqo şirkətləri fəaliyyət göstərsə də, lakin onların heç də əksəriyyəti müştərilərə lazımı xidmət göstərmir. Bəzi hallarda karqo firmaları tərəfindən aldadılma, gecikdirilmə problemləri də olur.

Sonxeber.az-a gələn şikayətlərə nəzər saldıqda karqo şirkətlərinin adlarının tez-tez hallandığının şahidi oluruq. Şikayət edən müştərilər firmaların məsuliyyətsizliyindən və fırıldaqçılığından gileylənirlər. Məhsulun çatdırılmasında gecikmələr, xəbərdarlıq olunmadan qiymətlərin qaldırılması, şikayət və müraciətlər üçün edilən zənglərə gəlməyən cavablar müştəriləri təngə gətirib. Bundan əlavə, karqo şirkətlərinin maraqlı bir fırıldaq üsülü da var. Məhsulların zədələnməməsini bəhanə gətirərək üzərini bir dəfə yox, bir neçə dəfə bükürlər. Bu da çəkini ağırlaşdırır və birbaşa qiymətə təsir edir.

Mövzu ilə əlaqədar İqtisadçı ekspert Vüqar Bayramov məsələyə münasibət bildirib. O, düşünür ki, sırf bu bazarda alternativlər çox olmadığı üçün, təkliflər də vətəndaşların yox, şirkətlərin maraqları üzərində qurulur.

"Bilirsiniz, bazarda alternativlər olsa, belə olmaz. Alternativlər çox olsa, xidmətlər də keyfiyyətli olar. Rəqabətlilik olar və şirkətlər məcbur keyfiyyətli xidmət təklif edərlər. Bu sahə genişlənməlidir. Indiki halda bu, əlavə xərc tutmaqdır. Bu yolla, vətəndaşlardan artıq pul alıb, şirkətin gəlirlərin artırırlar. Bu məsələyə də nəzarət yoxdur. Bu sahəyə ciddi nəzarət olmalıdır. Qaydalar müəyyənləşməlidir. Xidmətin dəyərindən artıq pul tutmaq olmaz".

Lamiyə Məmmədova

Telegramda izləyin