Mediada azyaşlıların üzünün açıq şəkildə göstərilməsi nə dərəcədə düzgündür? - MEDİA EKSPERTİNDƏN AÇIQLAMA

Son günlər mediada uşaqların üzlərinin açıq şəkildə yayımlandığı hallara tez-tez rast gəlmək olur. Bu, sadəcə görüntü paylaşımı deyil - uşaqların təhlükəsizliyinə birbaşa təsir edir və psixoloji, sosial problemlərə səbəb ola bilər. Media qurumları uşaqların hüquqlarını və təhlükəsizliyini ön planda saxlamalı, yayılan hər bir görüntünün onların gələcəkdə özünü qoruma imkanlarını məhdudlaşdıra biləcəyini nəzərə almalıdır.
Mövzu ilə bağlı Azvision saytının rəhbəri, media eksperti Vüsal Məmmədov BiG.AZ-a açıqlamasında bildirdi ki, mənim dostumun oğlu baxçada tərbiyəçinin təzyiqinə məruz qalmışdı. Onun sözlərinə görə, bu haqda saytlar yazdı. Yəni uşağın adı, şəkili hamısı xəbərdə getmişdi: "Sonra həmin uşaq böyüdü və məktəbə getdi. Bir neçə ildən sonra bu ailəyə və uşağın özünədə problem yaratmağa başladı. Çünki məktəb yoldaşları uşağın adını internetdə yazırdılar və həmin yazı və şəkil çıxırdı. Eyni zamanda ailənin qohumları internetdə uşağın adını yazanda həmin xəbər çıxırdı və bu narahatlıq yaradırdı. Həmin yoldaş xəbəri saytlardan çıxartdırmaq istəyirdi.

Buna görə 2 ilə yaxın əziyyət çəkdi. Bir neçə üzdəniraq redaktor xəbəri saytdan çıxartmaq üçün ondan pul tələb etmişdi. Məndə ona əlimdən gələn köməyi etdim. Nəhayət 2 ildən sonra böyük çətinliklə biz buna nail olduq. Mən düşünürəm ki, ümumiyyətlə özünün adının mediada hallanmasını istəməyən istənilən bir şəxslə bu məsələdə anlayışlı davranmaq lazımdır. Məsələn, ola bilər ki, bir xanım əri tərəfindən zorakılığa məruz qalıb, boşanıb və yenidən ailə qurub.

Onun adının internetdə köhnə konteksdə hallandırılması, yeni ailəsində həyat yoldaşı ilə münasibətdə problem yaradır. Biz anlayışla qarşılamalıyıq. Ola bilər ki, insan nəsə bir xırda dələduzluq törədib, amma yeni həyata başlayıb və yeni həyatda bu xəbərlər ona mane olursa, anlayışla qarşılamalıyıq. İnsanın bir unudulma haqqı olmalıdır və biz bu haqqı tanımalıyıq. Uşaqlar isə bunu dərk eləmirlər və böyüyəndə xəbərlər onlara problem yarada bilər.

Onların əvəzinə jurnalist bunu nəzərə almalıdır, düşünməlidir ki, bizim yazdığımız xəbər kiminsə həyatında çətinliyə, xoşagəlməz hallara səbəb olmamalıdır. Bu bizim missiyamıza ziddir. Biz insanın həyatını daha yaxşı eləmək üçün, yüngülləşdirmək üçün bunu yazırıq. Yox o məqsədlə material hazırlayıb, əksinə insanın gələcəyində ona mane olacaq hallara səbəb oluruqsa, deməli düz iş görmürük. Meyar bu olmalıdır və təssüfki çoxları bu meyarı nəzərə almırlar".

Telegramda izləyin