Millət vəkili: "Müxalifətin seçkidə iştirak edib-etməməsi cəmiyyəti qətiyyən maraqlandırmır"
Azərbaycanda növbədənkənar parlament seçkiləri rəsmən elan olunub. Fevralın 9-da ölkədə seçkilər keçiriləcək. Normalda siyasi qüvvələr artıq seçkilərə hazırlaşmalı idi. Lakin görünən odur ki, müxalifətin radikal qanadı boykot çağırışlarıan başlayıb. Xalqı seçkilərə deyil, kütləvi etirazlara, yüzminlik aksiyalara çağırır. Əslində seçki kampaniyası bütün siyasi qüvvələr üçün xalqla geniş təmas, ideya və planlarını xalqa təqdim etmək üçün ən ideal fürsət olduğu üçün normalda müxalifət qüvvələri seçkilərə gedir, çünki istənilən halda seçkidə iştirak boykotdan daha effektivdir. Lakin görünən odur ki, ənənəvi radikal müxalifət cəmiyyətə yeni heç nə vəd eləmir. Son aylarda ölkə siyasətindəki dinamikanın fonunda Milli Şura və ya digər müxalif təşkilatlar yalnız aksiya keçirmək təşəbbüsü ilə gündəmə gəlib və bu zaman heç bir yeni, hazırkı şərtlərlə ayaqlaşan şüarlar təklif edə bilməyib.
Mövzu ilə əlaqədar Azərbaycan Milli Məclisinin deputatı Aydın Mirzəzadə Sonxeber.az-a bildirib ki, siyasi partiyaların əsas vəzifəsi hakimiyyətə gəlməkdir və bu orqanlarda daha çox yer qazanmaqdır:
"Azərbaycanın əsas siyasi partiyaları bu istiqamətdə daim iş aparırlar. Ancaq bununla belə, müxalifətin radikal qanadı bir qayda olaraq əhalini itaətsizliyə, qeyri qanuni kütləvi aksiyalara çağırır. Onların seçkiyə getməməsinin yeganə səbəbi onların seçkiyə hazır olmamağıdır. Onların 125 dairə üzrə irəli sürəcək namizədləri yoxdur. Onlar bilirlər ki, cəmiyyətlə işləmədiklərinə və cəmiyyətin maraqlarını öz siyasətində əks etdirmədiklərinə görə cəmiyyətdən hər hansı bir səs ala bilməyəcəklər. Həmçinin bunlar sabah uğursuzluğa düçar olanda, tərəfdarları nəyə görə iddialarının həyata keçmədiyini soruşacaqlar. Bu baxımdan boykota üstünlük verirlər. Digər tərəfdən, onların seçkidə iştirak edib-etməməsi cəmiyyəti qətiyyən maraqlandırmır. Seçki, bir qayda olaraq seçkidə iştirak etmək istəyən siyasi qüvvələr arasında keçir və bu seçkilərə də maraq indinin özündə də göründüyü kimi, həddindən artıq böyükdür".
Fəridə Ağazadə
Sonxeber.az Telegramda izləyin instagramda izləyin
Şikayətiniz varsa Whatsapp: 051 7028255
Facebookda Paylaş