"Namizədlərin çox olması problem deyil"-Sosioloq parlament seçkilərindən DANIŞDI

Azərbaycanda Milli Məclis buraxıldı və 2020-ci ilin fevral ayının 9-da növbədənkənar seçkilər elan edildi. İki ay sonra vətəndaşlar səsverməyə gedərək özlərinin yeni millət vəkillərini seçəcəklər. Müşahidələr onu deyir ki, bu dəfə namizədlərin sayı çox olacaq...

Mövzu ilə bağlı Sonxeber.az-a sosioloq Ağasəlim Həsənov danışıb. O, bildirib ki, son zamanlar cəmiyyətdə bu istiqamətdə dəyişikliklər hiss olunmaqdadır. Artıq insanlarda seçkilərin şəffaf, demokratik keçirilməsi ilə bağlı ümidlər formalaşıb. Buna misal olaraq müxalif siyasi partiyaların da seçkilərə qoşulmasını qeyd etmək olar. Siyasi qüvvələr də, bu seçkilərdə iştirak etməklə bağlı öz qərarlarını veriblər. Seçkilərdə ümumiyyətlə cəmiyyətin bütün sferalarının, təbəqələrinin iştirakı müsbət hal kimi qiymətləndirilməlidir. Yəni, insanların öz ictimai-siyasi həyatına biganəliyi ümumiyyətlə neqativ bir hal kimi dəyərləndirilir. Çünki insanlar öz ictimai-siyasi həyatlarında baş verən hadisələrə o qədər də, adekvat münasibət göstərmirlər. Amma son proseslər göstərir ki, artıq müəyyən qədər hərəkətlənmə var və bu seçkidən cəmiyyət gözləntiləri var.
Sosioloq vurğulayıb ki, namizədlərin çox olması da problem deyil. Hər kəs özünü bu seçkilərdə sınamaq istəyir. Bu onların Azərbaycan Respublikasının vətəndaşı kimi hüququdur. Müəyyən şərtlər daxilində bu hüquqdan hər kəsin istifadə etmək imkanı var. Açıq-aşkar həm seçki məcəlləsində, həm də Azərbaycan Respublikasının Konstitusiyasının maddələrində,

Azərbaycan Respublikasının vətəndaşlarının seçmək və seçilmək hüququ aydın şəkildə təsdiq olunmuşdur. Və mən bunu müsbət hal kimi qiymətləndirirəm. Düşünürəm ki, proses belə davam etsə, namizədlər arasında normal seçki münbarizəsinin şahidi olacağıq. Seçkilərin normal, pozitiv olmasını istəyirik, arzulayırıq, ən azından burada cəmiyyət də, dövlət də qazanmış olacaq. Çünki bizim qanunlarımız buna yol açır. Yəni namizədlərin sayı çox olur-olsun. Namizədlərin sayını qarşılayacaq bir kvotanın müəyyənləşməsi də qanunvericilikdə nəzərdə tutulmayıb. Bir-birinə rəqib olan qüvvələr istər iqtidar, istərsə də müxalif, yəni ümumiyyətlə demokratik bir mühitin formlaşmasından Azərbaycan dövləti, Azərbaycan cəmiyyəti qazanacaq. Bu nəticə etibarı ilə seçkilərin həm də beynəlxalq təşkilatlar tərəfindən bir demokratik seçki kimi qiymətləndirilməsinə öz pozitiv təsirini göstərəcək.

Fəridə Ağazadə

Telegramda izləyin

instagramda izləyin