Yeni il gecəsi üçün ilhamverici saç stilləri - FOTO

Yeni il elə bir bayramdır ki, hər bir qız həmin gecə hamıdan cazibədar görünmək istəyir. Bayramı sevsəniz və ya sevməsəniz də, parıltılı libasları geyinmək üçün gözəl bir bəhanədir. Zərif cinsin nümayəndələri bayrama həftələr öncəsindən hazırlıqlara başlayır, bazarlıq edir, menyu tərtib edir, bayram obrazları və makiyaj üzərində düşünür, əlbəttə ki, saç düzümü haqqında unutmaq olmaz.

Publika.az modapərəstlərin bayram obrazı üçün ulduzların qırmızı xalı çıxışlarından ilham verən bir neçə saç düzümü seçib.

Bərbəzəkli abadoklar

Romantik, dəbdəbəli və müasir... Saç bəzəkləri ötən mövsümün ən populyar aksessuarlarından birinə çevrildi. Xüsusilə məxmər abadokları demək olar ki, bütün fəşn blogerlərin başında gördük. Yeni il gecəsində bu populyar üslubdan istifadə edin! Romantik geyimlərə uyğun abadok və saç lentləri obrazın əla tamamlayıcısı olacaq.

Hündür yığılmış at quyruğu saç stili

At quyruğu saçlar əsasən dinamik geyimlər üçün idealdır. Biserli və ya zərli libasların fonunda sıx yığılmış saçlar daha səliqəli təsir bağışlayır. Yuxarıda toplanmış sıx at quyruğu ilə modern və gənc görünəcəksiniz.

Saç toqqaları

Utanmayın, nə qədər toqqa varsa, telinizə düzün. Bu il stilistlər saçları istənilən sayda saç toqqaları ilə bəzəməyə icazə verir. Toqqa çılğınlığı Yeni il şənliyində lap yerinə düşər. Svarovski və ya mirvari ilə işləməli toqqalar sizi gecənin ulduzu edəcək.

Saç lentləri

Uşaqlığı yada salan saç lentləri məsumluğunuzu üzə çıxaracaq. Belə saç bəzəkləri ötən il qırmızı xalı mərasimlərinin əvəzedilməz bəzəyi idi. Paltarınıza nostalji əlavə edən lentləri istər yarımçıq, istərsə də tam yığılmış saçlarla istifadə edə bilərsiniz. Stilistlər onları çiyin dekolteli libas və bluzlarla kombinə etməyi tövsiyə edir. Romantika və seksuallığın vəhdəti sayəsində unudulmaz obraz yarada biləcəksiniz.

Düz kare saç

Klassikanı heç nəyə dəyişə bilməyənlər üçün ortadan ayrılan düz saçlar eynilə at quyruğu yığımı kimi bərbəzəkli, gümüşü və ya qızılı geyimlərlə daha çox yaraşacaq.

Hörüklər

Tül, gipür və krujeva donları hörüklərsiz təsəvvür etmək olmur. Odur ki, dağınıq toppuzlara hörüklər əlavə edib romantikanı bir qədər də artırın.

Açıq dalğalar

Dağınıq dalğalar xüsusilə ombre saçlarda effektli təsir yaradır. Yeni il şənliyi üçün şalvar və ya kostyum seçmisinizsə, saçları açıq qoyun. Romantik dalğalar kostyumun sərtliyini yumşaldacaq.

Buruqlar

Təbii saçlarınız dalğalı, qıvrım və ya buruqdur? O zaman təbii gözəlliyinizi nümayiş etdirməyi arzu edirik. Niyə? Çünki bu mövsüm qıvrım və təbii buruqlar olduqca dəbdədir. Yan tərəfdən ayrılmış saçlar daha həcmli görünür. Bu saç tərzi ilə ən sadə əlbisənizə bayram ovqatı, üsyankar və cəlbedici ruh əlavə edə biləcəksiniz.

İki toppuz

Düyünlü toppuzlar hər məclis üçün uyğun ola biləcək saç düzümü deyil. Ancaq "Ulduz müharibələri" ilə məşhurlaşan iki toppuz, ilin ən əyləncəli gecəsi üçün uğurlu seçimdir.

Telegramda izləyin