Xəftər Moskvada atəşkəsi niyə imzalamadı?-Pərdəarxası məqamlar

Liviya Milli Ordu Komandiri Xəlifə Xəftər dünən atəşkəs razılaşmasını imzalamadan Moskvadan ayrıldı.
Bəs nə üçün Xəftər masanı tərk etdi?
Liviyada proseslərin inkişafı necə davam edəcək?

Mövzu ilə bağlı politoloq Mübariz Əhmədoğlu Sonxeber.az-a açıqlama verib. O, bildirib ki, əslində Xəftərin o müqaviləni imzalamamasının səbəbi çox aydındır:
"Çünki Xəftərin heç bir siyasi strukturlaşması yoxdur. O, Liviya məsələlərində nə edirsə, ancaq ordunun gücü ilə edir. Amma ondan qabaq Liviyanın iki təmsilçisinin hərbidə gücü Xəftərdən bəlkə də az idi. Sadəcə onların əhali arasında siyasi strukturlaşma və dəstəkləri vardı. Ona görə də Xəftər silahsızlaşdırmanı, yəni, qoşunların geri çəkilməsini qəbul edə bilməzdi. Xəftər müqaviləyə ona görə imza atmadı ki, o, oradan qoşunları çıxarmalı, dinc proseslərdən istifadə etməlidir. Xəftərin ondan başqa silahı yoxdur. Sadəcə Xəftər çalışdı ki, ora tarix yazdırsın. Tutaq ki, Xəftər 6 ay ərzində və yaxud 6 aydan sonra oradan çıxmalıdır amma o, bununla razılaşmadı. Liviyanın Milli Hökuməti özünü bu gün oradakı prosesləri siyasi baxımdan tənzimləməyə hazır hesab edir. Hadisələr hansı istiqamətdə gedir? Yəni nə qədər maraqlı olsa da, məhz Xəftərin müqaviləyə imza atmaqdan imtina etməsi ilə Rusiyanın Kipr sahillərinə donanma göndərməsi informasiyası eyni vaxta təsadüf etdi. Faktiki Xəftərin müqaviləyə imza atmaması, Liviya məsələlərində Türkiyənin mövqeyinin güclənməsi, Rusiyanın mövqeyinin isə zəifləməsi anlamını daşıyır. Ona görə də Rusiya hazırda imkan verə bilməz ki, Türkiyə Liviyada güclənsin. Hazırda Liviyada elə vəziyyətdir ki, normal siyasi şərtlərə, beynəlxalq hüquq normalarına uyğun hazırlanan müqavilədən məhz Rusiyanın öz adamı imtina edib. Rusiya da bunu özünə təhlükə görən kimi Kiprə donanma yeridəcəyini bildirdi. Niyə donanma? Çünki, Kipr ilə Türkiyə arasında böyük mübahisə var. Bilirsiniz ki, Kiprə yaxın ərazidə neft-qaz yatağını Türkiyə özününkü kimi bilir və hazırda Türkiyə orada kəşfiyyat işləri aparır. Kipr və Yunanıstanın yalnız bəyanat verməyə gücü çatır. Çünki Türkiyə ordusu onların hər ikisindən daha güclüdür. Belə ki, Kipri hərbi baxımından Türkiyəyə qarşı gücləndirməkdən ötrü Rusiya öz qoşunlarını Kiprə göndərdi. Hadisələrin inkişafı yaxın zamanlarda Liviya ətrafında birbaşa olmasa da, dolayı prizmadan gərginləşəcək. Rusiya başa düşür ki, Liviya məsələsi üzrə BMT-nin patronajı altında Berlin konfransında da uduzacaq. Ona görə Rusiya indidən belə bir addımı atıb".

Fəridə Ağazadə

Telegramda izləyin

instagramda izləyin