"Erməni sərhədçilərinin rüşvətxorluq amili Ermənistanda virusun yayılmasına səbəb ola bilər" - Politoloq RƏYİ
Ermənistan koronavirusun yayılmasının qarşısının alınması ilə bağlı tədbirlər çərçivəsində Gürcüstanla sərhədi bağlamağa hələ ehtiyac görmür.
Bu barədə Ermənistanın Təhlükəsizlik Şurasının katibi Armen Qriqoryan bildirib. Onun sözlərinə görə, sərhədlərin bağlanmasına zərurət yaranan zaman bu məsələ müzakirə olunacaq: "Biz hələ bu vəziyyətə çatmamışıq. Təhlükəsizlik baxımından bu məsələni müzakirə edəcəyik və lazım gələrsə, sərhədi bağlayarıq". Nəzərə çatdıraq ki, fevralın 26-da Gürcüstanda koronavirusa ilk yoluxma halı qeydə alınıb.
Maraqlıdır, koronavirus kimi təhlükəli bir xəstəliyin yayıldığı dövrdə, Ermənistanın İranla bəhanə kimi sərhədi bağlayıb, bunun əksinə Gürcüstanla sərhədi bağlamamasına səbəb nədir?
Bununla bağlı Sonxeber.az-a danışan politoloq Mübariz Əhmədoğlu Ermənistanın İranla sərhədini koronavirusdan qorunmaq üçün bağlamasını bəhanə kimi, Gürcüstanla sərhəddini açıq saxlamasını isə strateji çıxış nöqtəsi kimi dəyərləndirib:
"Ermənistanda bu gün hər şey siyasiləşib. Yəni, Ermənistanın İranla sərhədini koronavirusdan qorunması üçün bağlaması bəhanədir. Əgər Avropanın, Amerikanın gözü qarşısında Ermənistan İranla sərhəddi bağlamasaydı, bunun izahını verə bilməzdi. Ona görə düşünürəm ki, burda koronavirus faktorundan çox siyasi faktor var.
Gürcüstanda da hazırda koronavirus halı aşkarlanıb. Ermənistan isə İranla müqayisədə Gürcüstanla sərhədi bağlamaq istəmir. Bu Ermənistanın siyasəti deməkdir. Çünki bağlasa, bütün dünyaya çıxış yolu bağlanacaq. Həm də Ermənistanın bu addımı atması, yəni Ermənistanın Gürcüstanla İranı bərabər tutması Qərb dövlətlərinin acığına gələ bilər. Bu baxımdan koronavirusa münasibətin siyasi olduğunu düşünürəm.
Politoloq Gürcüstanın özünün də sözügedən məsələyə münasibətinin siyasi olduğunu açıqlayıb:
"Təxminən İran qədər İtaliyada da koronavirus halı aşkarlanıb. Buna baxmayaraq, İtaliyaya Gürcüstanın hava yollarından təyyarə uçuşları davam edir. Bu gün Gürcüstanda 2-ci koronavirus halı da aşkarlanıb. Həmin şəxs məhz İtaliyadan gələn gürcü vətəndaşında qeydə alınıb".
Ermənistan və İran arasında həm hava, həm quru yolları bağlı olduğunu deyən politoloq yalnız əvvəlcədən sərhədi keçmək üçün sənədlə icazə verilmiş yük maşınlarının Ermənistan-İran sərhədindən keçə biləcəyini vurğulayıb. Mübariz Əhmədoğlu həmçinin erməni sərhədçilərinin rüşvətxorluq amilinin məhz virusun yayılmasında rol ala biləcəyini də bildirib:
"Əgər İrandan Ermənistan vətəndaşı gəlirsə, o Ermənistanın İrandakı səfirliyinə müraciət etməli, orda qeydə alınmalıdır. Hazırda Ermənistanın İrandakı səfirliyində 65 nəfər ermənistanlı vətəndaş qeydiyyatdadır. Onları Ermənistana göndərəcəklər. Burda ayrı bir məsələ də var. Gürcüstan Ermənistanda rüşvətin geniş yayıldığını bilir. Ermənistan sərhədçiləri rüşvətxordur. Əgər sərhədçilər İrandan gələn vətəndaşlardan pul alıb ölkəyə buraxsalar, Gürcüstan Ermənistanla sərhədi dərhal bağlayacaq. Ermənistan üçün əslində bu siyasi parametrdir. Hadisələrin gedişindən demək olar ki, Ermənistan hər tərəfdən sıxılır. Ermənistan həm Rusiya tərəfdən, həm də Amerika tərəfdən də müəyyən sillələr alır, İranla isə sərhəddi bağlıdır.
Ermənistan elə bir vaxt gələ bilər ki, yalnız Azərbaycandan asılı olacağını başa düşməlidir".
Şəlalə Babayeva
Sonxeber.az Telegramda izləyin instagramda izləyin
Şikayətiniz varsa Whatsapp: 051 7028255
Facebookda Paylaş