Polisdən 3 şəhərdə, 3 rayonda əməliyyat: 10 həbs

Lənkəran şəhər-rayon polis şöbəsinin əməkdaşlarının keçirdikləri əməliyyat-axtarış tədbirləri nəticəsində narkotiklərin qanunsuz dövriyyəsi ilə məşğul olan şəxs saxlanılıb.

Sonxeber.az Teleqraf.com-a istinadən xəbər verir ki, onun üzərindən və yaşadığı evdən külli miqdarda müxtəlif növ narkotik vasitələr aşkar edilərək götürülüb.

Polis əməkdaşlarının daxil olmuş məlumat əsasında keçirdikləri əməliyyat-axtarış tədbirləri nəticəsində narkotiklərin qanunsuz dövriyyəsində şübhəli bilinən Lənkəran rayonunun Şilavar kənd sakini Səfər Bunyatov saxlanılıb.

Onun yaşadığı evə özünün iştirakı ilə keçirilən baxış zamanı oradan 6 bükümdə ümumi çəkisi 55 qram narkotik vasitə tiryək, 10 bükümdə ümumi çəkisi 41 qram heroin, 6 bükümdə ümumi çəkisi 13 qram psixatrop maddə olan metamfetamin, 5 bükümdə ümumi çəkisi 4 qram qurudulmuş marixuana və narkotik vasitələrin satışı üçün istifadə etdiyi elektron tərəzi aşkar edilərək götürülüb.

Onun üzərinə keçirilən şəxsi axtarış zamanı da bir bükümdə heroin aşkar edilərək götürülüb.

Bundan başqa, Sumqayıt şəhər Polis İdarəsinin əməkdaşlarının keçirdikləri əməliyyat tədbirləri nəticəsində külli miqdarda narkotik vasitə qanunsuz dövriyyədən çıxarılıb.

1-ci polis bölməsi əməkdaşlarının keçirdikləri əməliyyat tədbirləri nəticəsində şəhər sakini, əvvəllər məhkum olunmuş F.İbrahimovdan 3 kiloqram 200 qram, 3-cü polis bölməsi əməkdaşları tərəfindən şəhər sakinləri olan, əvvəllər məhkum olunmuş E.Abbasovdan 470 qram, A.Şahmuradovdan isə 490 qram, 4-cü polis bölməsi əməkdaşları tərəfindən şəhər sakini, əvvəllər məhkum olunmuş T.Şahbazovdan 465 qram marixuana aşkar edilərək götürülüb.

Daha bir əməliyyat Gəncə şəhərində keçirilib.

Nizami (Gəncə) rayon Polis İdarəsi əməkdaşlarının keçirdikləri əməliyyat tədbirləri nəticəsində martın 7-də və 9-da Gəncə şəhər sakinlərinə məxsus 2 avtomobildən mobil telefon, maqnitofon və səsgücləndiricilər oğurlamaqda şübhəli bilinən şəhər sakini, əvvəllər məhkum olunmuş M.Sultanov saxlanılıb.

Oxşar əməliyyat Saatlı rayonunda da keçirilib.

Saatlı rayon polis şöbəsi əməkdaşlarının keçirdikləri əməliyyat tədbirləri nəticəsində yanvarın 9-da Əhmədbəyli kəndi ərazisində yerləşən qəbristanlıqdakı məzarlardan birinin ətrafına quraşdırılmış məhəccərin alüminiumdan olan bəzək əşyalarını oğurlamaqda şübhəli bilinən kənd sakini M.Əsgərov saxlanılıb.

Bundan başqa, Saatlı rayon polis şöbəsi əməkdaşları tərəfindən şəhər sakini, əvvəllər məhkum olunmuş N.Mirzəyevdən 425 qram marixuana və 0,220 qram heroin götürülüb.

Oşxar əməliyyat Yevlax rayonunda da keçirilib.

Yevlax rayon polis şöbəsi əməkdaşlarının keçirdikləri əməliyyat tədbirləri nəticəsində şəhər sakini, əvvəllər məhkum olunmuş E.Ocaqquliyevdən 451,87 qram marixuana götürülüb.

İmişli rayon polis şöbəsi əməkdaşları tərəfindən Xubyarlı kənd sakini Q.Şükürovdan 1 ədəd "TOZ-16" markalı ov tüfəngi götürülüb.

Telegramda izləyin

instagramda izləyin