"Həbib bəy Səlimovun komandanlığı altında Azərbaycan ordusu Qarabağı erməni təcavüzkarlarından azad edib"-Tarixçi-alim
Fevralın 8-i görkəmli Azərbaycan sərkərdəsi Həbib bəy Səlimovun anadan olmasının 139-cu ildönümü olub.
Həbib bəy Səlimov Azərbaycan Xalq Cümhuriyyəti Ordusunun təşəkkül tapmasında misilsiz xidmətlər göstərmişdir. O, Cümhuriyyət Ordusunda Dəftərxana rəisi, Əlahiddə Azərbaycan Korpusunun Qərargah rəisi, Azərbaycan qoşunlarının Cənub qrupunun komandanı, Azərbaycan korpusunun Baş Qərargah rəisi və Baş Ərkan-i Hərbin rəhbəri vəzifələrində çalışmışdır.
Həbib bəy Səlimov Bakının düşmən Bakı Soveti hakimiyyətindən azad edilməsindəki xidmətlərinə görə general-mayor rütbəsi ilə təltif olunmuşdur. 1919-cu ilin yayında Həbib bəy Səlimovun başçılıq etdiyi hərbi birləşmə Muğan və Lənkəran bölgəsində Azərbaycan dövlətinin hakimiyyətini tam bərqərar etməyə nail olmuşdur. 1920-ci ilin aprelində isə Həbib bəy Səlimovun komandanlığı altında olan Azərbaycan qoşunları Qarabağı erməni təcavüzkarlarından azad etmişdir
Həbib bəy Səlimovun Azərbaycan Xalq Cümhuriyyəti Ordusunun təşəkkül tapmasında misilsiz xidmətlər ilə bağlı tarixçi-alim Dilavər Əzmli Sonxeber.az-a danışıb:
"Biz Azərbaycan Cümhuriyyəti qurucularının irsinə yiyələnə bilmişikmi? Əlbəttə ki, yiyələnə bilməmişik. Soruşa bilərsiniz niyə? Ona görə ki, biz bu irsi oxumuruq. Bu irs Ali məktəblərdə tədris olunmur. Biz sadəcə onların adlarını bilirik. Amma anlaya bilmirik ki, onlar XX əsr dünya siyasətinin ən aparıcı simaları idilər. Biz Ali məktəblərdə Avropa, ABŞ siyasətçilərinin həyatlarını doğum gününə qədər öyrənirik amma özümüzünkülərdən xəbərimiz yoxdur. Bizim diplomatlar Əlimərdan Topçubaşovun diplomatik fəaliyyətindən, Məhəmmədəmin Rəsulzadə irsindən nə dərəcədə xəbərdardırlar? Belə insanlar sırasına Həbib bəy Səlimov da daxildir. Bu insan ziyalı ailəsində dünyaya göz açmış şərəfli bir nəslin nümayəndəsidir. Bu insanlar qanına qədər millətini sevən adamlar idi. Ona görə də onlar Azərbaycanda müstəqil dövlətin yaranmasını can-başla qarşıladılar. Belə şəxslərdən biri olan Həbib bəy Səlimov güclü hərbçi idi. Bizim hərbçilərdən hərbiyə aid kimləri soruşsanız, başlayacaqlar Jukovu, Konevi, Budyonnını misal çəkməyə. Onların Həbib bəy Səlimovdan xəbərləri varmı? Əliağa Şıxlınski üçlüyündən İtaliyada hərbi məktəblərdə dərslər keçirlər. Bizdə keçirlərmi? Həbib bəy Səlimov mahir hərbçi idi. Cümhuriyyətin ağır günlərində ön cəbhəyə getdi və onu elə-belə göndərmədilər. Çünki güclü hərbi istedada malik idi. O zaman Muğanda vəziyyət ağır idi. Eser, ağqvardiyaçılar, bolşeviklərlə birləşən ermənilər və molokanlar Muğanı viranə qoymuşdular. Bakı ilə əlaqə yox idi. Bunun öhdəsindən gəlmək üçün Cümhuriyyət rəhbərləri məhz Həbib bəy Səlimovu oraya göndərdi və o da öhdəsindən məharətlə gəldi. Muğan düşmənlərdən təmizləndi və vətənimizin həmişə olduğu kimi ayrılmaz hissəsinə çevrildi. Biz daha sonra Həbib bəy Səlimovu Qarabağda görürük, erməni gavurları və rus hərbi birlikləri ilə döyüşür. Bu gün bu cür insanları yad etməklə, həm də tövsiyyə edirik ki, onların irsini dərindən öyrənək. Onda bizim Vətən, Millət və Dövlətə sevgimiz daha da dərinləşəcəkdir. Məhz, bu Həbib bəy Səlimovlar məktəbi də Həzi Aslanov kimi sərkərdələri, eyni zamanda bu məktəb də öz növbəsində Mübariz İbrahimovları yetişdirdi. Bu genetik məktəbdir!".
F.Ağayeva
Sonxeber.az Telegramda izləyin instagramda izləyin
Şikayətiniz varsa Whatsapp: 051 7028255
Facebookda Paylaş