Ermənistanla sülh müqaviləsi hansı tarixdə imzalanacaq? - AÇIQLAMA

"Biz sülh müqaviləsinin hansı şərtlərlə imzalanacağına fikir verməliyik. Ermənistan tərəfi indi yalnız mümkün qədər çox güzəşt əldə etməyə çalışır. Bütün bunlara görə də təxribatların baş verir.

Bu sözləri Sonxeber.az-a açıqlama verən Sosial Tədqiqatlar Mərkəzinin Mətbuat Xidmətinin rəhbəri, beynəlxalq məsələlər üzrə mütəxəssis Əziz Əlibəyli deyib.

O bildirib ki, bu ay, yaxud gələn ayın sonu sülh müqaviləsi ilə bağlı məsələlər açıqlana bilər:

"Hazırda Ermənistan tərəfi sülh müqaviləsinə yönəlik addımlar reallaşdırır və buna da məcburdur. Paralel şəkildə görürük ki, Paşinyanın bəzi açıqlamaları elə fikir yaradır ki, sanki bu proseslər getmir. Son dəfə "Biz Zəngəzurdan dəhliz verməyəcəyik" deməsi də bunun sübutudur.
Maraqlı məqam isə ondan ibarətdir ki, Zəngəzur dəhlizi beynəlxalq əhəmiyyətə malikdir və proseslər elə gətirə bilər ki, Zəngəzur dəhlizi reallaşar, onun idarə edilməsi Ermənistanın əlindən alınar. Ona görə də Paşinyanın çox sərt ritorika ilə danışmasına aldanmaq lazım deyil.

Düşünürəm ki, Qarabağda qalan erməni terrorçuları məsələsi, cəbhə bölgəsində atəşkəsin pozulması, Gorus-Qafan yolunda baş verənlər, BMT-də Azərbaycanın əleyhinə sənədlərin hazırlanması kimi hallar sülh müqaviləsi imzalanana qədər artan silsilə ilə davam edəcək.

Ola bilsin ki, hazırda sülh müqaviləsi üzərində yekun imzalar atılır. Son bir iki gün ərzində sülh müqaviləsi üzrə detalların başa çatması, hətta müqaviləyə imza atılması ilə bağlı fikirlər də səsləndirilir. Sülh müqaviləsinin imzalanması üçün heç bir maneə yoxdur. Ola bilsin, bu ay, yaxud gələn ayın sonu müqavilə və müqavilə şərtləri açıqlanacaq".

Aytəkin CƏLALİ

Telegramda izləyin