Azərbaycan status-kvonu öz gücünə dəyişib- RƏY

Xəbər verdiyimiz kimi, Rusiya Xarici İşlər naziri Sergey Lavrov 20-21 oktyabr tarixlərində Azərbaycan və Ermənistan XİN rəhbərləri Ceyhun Bayramov və Zöhrab Mnatsakanyanla ayrı-ayrı görüşlər keçirib. Söhbət zamanı Dağlıq Qarabağla bağlı atəşkəs razılaşmalarının icrasına dair aktual məsələlər müzakirə edilib.

Bununla bağlı Sonxeber.az-a politoloq Nəzakət Məmmədov danışıb:

"Bu görüş Moskvanın təşəbbüsü ilə baş tutan görüş idi. Görüşün məqsədi status-skvonu saxlamaq, hərbi əməliyyatlara başlamazdan əvvəlki vəziyyəti bərpa etmək, tərəfləri yenidən danışıqlar masasına dəvət etməkdir. "Azərbaycan və Ermənistan nəyisə özbaşına həll etməyə çalışmasın. Yəni Moskva necə göstəriş verirsə, proses də o cür həll olsun. Azərbaycan özbaşına status-kvonu dəyişməsin" Rusiyanın marağında olan məsələ budur. Amma biz gördük ki, Moskvanın bu səyləri mənasızdır. Humanitar atəşkəslərin imzalanmağına baxmayaraq Ermənistan tərəfi buna əməl etmədi. Bu o deməkdir ki, proseslər Moskvanın nəzarətindən çıxıb. Çətin ki artıq geri qayıda. Çünki Azərbaycan status-kvonu öz gücünə, şəhidlərin qanı bahasına dəyişib.

Azərbaycan tərəfi də buna heç vaxt getməz. Proseslər də onu göstərir ki, Azərbaycan Prezidenti müstəqil siyasət yeritməkdə qərarlıdır.

Minsk qrupunun həmsədrləri münaqişəyə biganə olmadıqlarını göstərmək üçün "sülh tərəfdarıyıq" və s bu adlar altında tərəfləri görüşlərə dəvət edirlər. Təbii ki bunun heç bir nəticəsi olmayacaq.

Status-kvo tamamilə dəyişib. Biz torpaqlarımızın bir hissəsini artıq işğaldan azad etmişik. Nəyə görə əvvəlki prinsiplər üzərində danışıqlar aparmalıyıq kı? Artıq o prinsiplər öz mahiyyətini itirib. Ümumiyyətlə, 27 sentyabr Dağlıq Qarabağ münaqişəsinin həllində yeni səhifə açdı".

Aysel Səmədli

Telegramda izləyin

instagramda izləyin