"Ermənistan tərəfi narahat olmalıdır ki..." - Politoloqdan Zatulinə CAVAB

Xəbər verdiyimiz kimi, ötən gün Rusiya Dövlət Dumasının deputatı Konstantin Zatulin parlamentdə çıxışı zamanı "Azərbaycanı yerinə oturtmaq lazımdır" ifadəsini işlədib. Qeyd edək ki, Zatulin hər zaman belə ifadələrlə Azərbaycan cəmiyyətində qıcığa səbəb olub.

Məsələ ilə bağlı Sonxeber.az saytına açıqlama verən politoloq İlyas Hüseynov bildirib ki, Konstantin Zatulin davamlı olaraq Azərbaycana qarşı müxtəlif vaxtlarda fikirlər səsləndirib:

"Zatulin kimi "marionet"lər gərgin zamanlarda Azərbaycana qarşı hansısa iradlar səsləndirərək, iki ölkə arasındakı əlaqələrə xələl gətirmək istəyir. Zatulin daha çox şovinist və millətçi kəsimi təmsil edir. Eyni zamanda, onun mövqeyində ermənipərəstlik müşahidə olunur. Həmişə Azərbaycana qarşı kəskin və sərt fikirlər səsləndirir. Lakin onun fikirləri böyük mənada heç nəyi dəyişmir. Zatulin davamlı olaraq bu tip fikirlər söyləmək əvəzinə, daha çox obyektivliyin qorunması istiqamətində çıxışlar etsəydi, zənnimcə, daha yaxşı olardı. Digər tərəfdən, Azərbaycan öz silah seçimində, eyni zamanda silah təchizatı ilə bağlı həyata keçirdiyi siyasətdə heç kimdən məsləhətləşməməlidir. Bu, Azərbaycanın suveren və müstəqil hüququdur. Azərbaycan Rusiya tərəfindən də silahlar alır və ölkəmizin silah arsenalında Rusiyanın da qabaqcıl silah modelləri var. Lakin Vətən müharibəsi göstərdi ki, bu günün, çağdaş dövrün müharibəsini aparmaq üçün süni intellektə əsaslanan müasir texnologiyaların tətbiqi uğur qazandırır və bu uğur 44 gün ərzində Azərbaycanın işğal altında olan torpaqlarının qısa zaman kəsimində işğaldan azad olunulması ilə nəticələndi. Qələbəmiz həmin silahların sayəsində başa gəldi. Silahların təkmilləşdirilməsi, beynəlxalq praktikada daha çox istifadə olunan bu silahların müasir standartlara cavab verməsi nəticəsində Azərbaycan da böyük zəfərə imza atdı. Ona görə də Azərbaycan Rusiya, Belarusiya, Ukrayna, Türkiyə, İsrail və digər dövlətlərdən silah alma siyasətini həyata keçirə bilər. Bu siyasətdən heç bir tərəf narazı qalmamalı, narahat olmamalıdır. Əgər Rusiyanın istehsal etdiyi, müasir tələblərə cavab verən silahlar olarsa, Azərbaycan o silahları da alacaq. Əsas məsələ ölkəmizin təhlükəsizliyi, müstəqilliyi, suverenliyi və ərazi bütövlüyünü qorumaqdır. Ona görə də burada Rusiya Dumasında çıxış edən hansısa deputatların narahatlığının heç bir əsası yoxdur. Çünki Azərbaycan öz xarici siyasət strategiyasına və hərbi-siyasi standartlara cavab verən kursuna uyğun olaraq mövqe irəli sürür. Bu mövqe Azərbaycan xalqının həm də siyasi iradəsidir. Ona görə də daha çox Ermənistan tərəfi narahat olmalıdır ki, bu silah alış-verişində Qafqazda təhlükəsizliyə, sülhə və sabitliyə təhdid törətmək istiqamətində birgə addımlar atırlar. Buna görə də Azərbaycanın həyata keçirdiyi siyasət daha çox sülhün qorunmasına və vətəndaşlarımızın təhlükəsizliyinin təmin olunmasına yönəlib".

Rafi Müslümov

Telegramda izləyin