Laçın təlimləri anti-terror əməliyyatlarının başlanğıcıdır? - AÇIQLAMA

Xəbər verdiyimiz kimi, ötən gün Laçın rayonunda Azərbaycan Respublikası ilə Türkiyə Respublikası arasında bağlanmış hərbi sahədə əməkdaşlıq haqqında sazişə əsasən, Laçın rayonunda birgə döyüş atışlı taktiki təlim başlayıb. Azərbaycan və Türkiyə hərbçilərinin iştirakı ilə keçirilən təlimdə əsas məqsəd döyüş əməliyyatlarının aparılması zamanı qarşılıqlı fəaliyyətin və döyüş uzlaşmasının təkmilləşdirilməsinə, o cümlədən komandirlərin hərbi qərar qəbuletmə və bölmələri idarəetmə bacarıqlarının inkişaf etdirilməsinə yönəldilib. Təlimdə müasir döyüş texnikası və digər hərbi vasitələrin çətin relyef şəraitində istifadə etmə vərdişlərinin artırılmasına xüsusi diqqət yetirilib.

Mövzu ilə bağlı Sonxeber.az saytına açıqlama verən politoloq Fikrət Sadıqov bildirib ki, bu təlimlərin məqsədi onları "silkələməkdir":
"Biz açıq şəkildə nümayiş etdiririk ki, Azərbaycan Türkiyə ilə vahid bir dövlət kimi hərbi təlimlər keçirdə bilər. Çünki axır zamanlar sülhməramlılar ermənilərə müəyyən şərait yaradır. Onların nəzarət etdiyi bölgədə qalan erməni diversantlar təxribatlarla məşğul olur, bizə qarşı atəşkəsi pozurlar. Bu, yolverilməzdir. Ən əsas da Azərbaycanın ərazi bütövlüyünə zidd və 10 noyabr bəyannaməsinin maddələrinə hörmətsizlikdir. Ona görə biz bu məsələlərin üzərinə açıq şəkildə gedirik və xəbərdarlıq edirik ki, əgər Azərbaycana qarşı hər hansı bir təxribat baş verərsə, biz öz ərazilərimizi müdafiə etmək üçün istənilən addımı atmağa hazırıq. Türkiyə də, təbii olaraq, yanımızda olcaq. İşlərini bilsinlər. Biz burada tək deyilik. Özlərini hüquqi formalar çərçivəsində aparsınlar".

Rafi Müslümov

Telegramda izləyin

instagramda izləyin