2027-ci ildə pensiyalar 7,5 faiz artacaq: Pensiyaçılar nə qədər qazanacaq? - İQTİSADÇIDAN AÇIQLAMA

2027-ci ildə pensiyaların 7,5 faiz artırılması nəzərdə tutulur. Bu məqsədlə 575,5 milyon manat vəsait ayrılması proqnozlaşdırılır. Gələn il əmək pensiyalarının orta aylıq məbləğinin 639-640 manata çatacağı gözlənilir. Bununla belə, pensiyaların nominal artımı onların real alıcılıq qabiliyyətinin də eyni səviyyədə yüksələcəyi anlamına gəlmir. Belə ki, 2027-ci il üçün orta illik inflyasiyanın 5,3 faiz olacağı proqnozlaşdırılır.

Ərzaq məhsullarının, kommunal xidmətlərin, dərmanların və digər gündəlik tələbat mallarının qiymətləri fonunda pensiyaların nəzərdə tutulan indeksləşdirilməsinin yaşlı insanların sosial rifahına nə dərəcədə təsir edəcəyi sual doğurur. Maraqlıdır, 7,5 faizlik artım pensiyaçıların real alıcılıq qabiliyyətini qorumaq üçün kifayət edəcəkmi?
Mövzu ilə bağlı Liberal İqtisadçılar Mərkəzinin sədri Akif Nəsirli Sonxeber.az-a açıqlamasında bildirdi ki, pensiyaların 7,5 faiz artırılması müəyyən mənada pensiyaçıların gəlirlərinin qorunmasına kömək edəcək. Lakin bu artımın onların real alıcılıq qabiliyyətini tam qoruyacağını demək çətindir. Çünki pensiyaçılar əsasən ərzaq, dərman və kommunal xidmətlərə daha çox vəsait xərcləyirlər. Bu məhsul və xidmətlərin qiymət artımı isə ümumi inflyasiya göstəricisindən yüksək ola bilər. Məsələn, pensiya 600 manatdırsa, 7,5 faizlik artım onun üzərinə cəmi 45 manat əlavə edir.

Əgər həmin dövrdə ərzaq və dərman xərcləri daha sürətlə bahalaşarsa, pensiyaçı nominal olaraq daha çox pul alsa da, əvvəlki həcmdə məhsul və xidmət əldə edə bilməyəcək. Digər tərəfdən, orta pensiyanın 639-640 manata çatması bütün pensiyaçıların bu məbləğdə pensiya alacağı demək deyil. Buna görə də indeksləşdirmə ilə yanaşı, xüsusilə aşağı pensiya alan vətəndaşların sosial müdafiəsinin gücləndirilməsi də vacibdir.

Müəllif: İlkin Məmmədkərimov

Telegramda izləyin