Rüstəm Muradov nə ilə yadda qaldı? - Deputatdan AÇIQLAMA

Xəbər verdiyimiz kimi, ötən gün Azərbaycanın Qarabağ bölgəsində müvəqqəti yerləşən Rusiya sülhməramlı qüvvələrinin komandanı olan general-leytenant Rüstəm Muradov xidməti vəzifəsini başa çatdırdı. Hələ may ayından söyləntilər gəzirdi ki, onun yerinə general-mayor Aleksey Avdeyev gətiriləcək. Lakin az öncə yayılan xəbərlərə görə, Rüstəm Muradovu Mixail Kosobokov əvəz edəcək. Bundan öncə o 58-ci birləşmiş ordunun komandir müavini, tanınmamış Abxaziyada Rusiya hərbi bazasının komandiri olub.

Bəs son 10 ay ərzində Rüstəm Muradov və komandanlıq etdiyi sülhməramlı qüvvələr nə ilə yadda qaldı?

Mövzu ilə bağlı Sonxeber.az saytına açıqlama verən deputat Fazil Mustafa bildirib ki, Azərbaycanın nöqteyi-nəzərindən götürsək, Muradovun fəaliyyəti dövründə xüsusi bir insident, böyük bir hadisələr və ciddi qarşıdurmalar baş verməyib, bölgədə normal münasibətlər sistemi qurulub:

"Sülhməramlıların necə özünü göstərməsi daha çox Rusiyanın prizmasından qiymətləndirilir. Çünki onlar tapşırığı oradan alan və bunu icra edən hərbi kontingentdir. Azərbaycanın nöqteyi-nəzərindən götürsək, xüsusi bir insident, böyük bir hadisələr və ciddi qarşıdurmalar baş verməyib, bölgədə normal münasibətlər sistemi qurulub. Onlar ermənilərə dəstək verəcək görüntülər, onlara yönəlik mərhəmətli və təbliğat xarakterli addımlar atıblar, amma bütövlükdə bu məsələlər toqquşmaya və yaxud da problem yaradacaq hansısa məsələyə gətirib çıxartmayıb. İndiki məqamda bu, qəbul olunan bir proses idi və gələcək növbəti şəxs hansısa bir tapşırıqla bölgədəki funskiyasından kənara çıxacaqsa, o zaman biz buna münasibət bildirə bilərik".

Fazil Mustafa qeyd edib ki, Rüstəm Muradovun fəaliyyətində aqressiya, yaxud hər hansı bir şəkildə Azərbaycana yönəlik açıq-aşkar hörmətsiz davranışlar sezilməyib:

"İndiki məqamda bu, bizim üçün qeyd olunmalı məsələdir. Bütövlükdə götürsək isə, Rüstəm Muradov bölgədə prosesləri tənzimləyən şəxs deyil, icraçıdır. Buna görə də ona verilən tapşırığı yetirirsə, biz daha çox tapşırıq verənlərin hansı tapşırığı verməsi üzərində fikir yürüdə bilərik. Bütün hallarda bizim üçün Rusiya sülhməramlılarının hələ arzuladığımız şəkildə tərəfsizliyini təmin edə bilməmişik. İlk növbədə, bunu təmin etməliyik.

Biz umuruq ki, sülhməramlılar sonrakı məqamda bütün tərəflərə müəyyən dərəcədə statusuna uyğun davranış göstərsinlər. Çünki oradakı sülhməramlı funksiyası bilavasitə sülhün bərpa edilməsindən ibarətdir, amma təəssüflər olsun ki, erməni diversant qrupları oradan atəş açırlar, təxribatlar törədirlər. Bu da sülhməramlıların öz funskiyasını layiqincə yerinə yetirmədikləri anlamına gəlir. Biz bunu dəfələrlə irad olaraq bildirmişik.

Hesab edirəm ki, növbəti təmsilçi bu detalları, Azərbaycanın həssalığını nəzərə almalıdır. Əks halda, etimadsızlıq göstərdiyimiz bir hərbi kontingentin bizim ərazimizdə qalmasını özləri üçün mümkünsüz edəcəklər".

Rafi Müslümov

Telegramda izləyin