Vaksin vurduran tələbələrə təhsil haqqında güzəşt ediləcək? - AÇIQLAMA

Özbəkistanda vaksin vurduran tələbələrə təhsil haqqını ödəməkdə 10 faiz güzəşt ediləcəyi barədə qərar qəbul edilib. Bəs Azərbaycanda da tələbələrə endirim tətbiq olunma ehtimalı varmı?

Məsələ ilə bağlı təhsil eksperti Kamran Əsədov Sonxeber.az-a açıqlama verib.

O, başqa çıxış yolunun olmadığını qeyd edərək bunları əlavə edib:

"Təəssüflə bildirirəm ki, Azərbaycanda və dünyada vaksin və vaksinləşmə ilə bağlı ciddi problemlər var. Yayılan bəzi məlumatlar insanları qorxudur. Halbuki vaksinlərin sağlamlıq üçün nəzərdə tutulan yeganə vasitə olduğunu hər birimiz gözəl bilirik. Buna görə də müxtəlif ölkələrdə bu və ya digər həvəsləndirici, eyni zamanda cəlbedici qaydalar qoyulur.

18 yaşdan yuxarı tələbələr yalnız vaksin pasportu əldə etdikdən sonra təhsil müəssisələrində iştirak edə bilərlər. Bir sıra ölkələr bunu digər həvəsləndirici addımlarla həyata keçirir, güzəştlər edir. Azərbaycanda belə bir təcrübə tətbiq edilə bilməz. Çünki bizim ölkəmizdə ödənişsiz təhsil alan insanların sayı ümumi tələbələrin 50 faizinə bərabərdir və hər 2 tələbədən biri pulsuz oxuyur. Yerdə qalan hissə isə, təbii ki, dövlətin xüsusi diqqət və qayğısına ehtiyacı olan müəyyən sosial kateqoriyaya aiddir. Birmənalı şəkildə bir daha vurğulayım ki, Azərbaycanda bu halın tətbiqi mümkün deyil. Çünki bu, süni şirinlikləndirici vəddir və neqativ nəticələrə gətirib çıxara bilər və bir çox hallarda güzəşt əldə etmək üçün müəyyən məhdudiyyətlərə və ya əsassız tələblərə səbəb olacaq addımdır.

Məsələn, Türkiyədə vaksin vurdurmaq istəməyən şəxslər əvəzinə hər həftə PZR(PCR) testi verməlidirlər. Bu isə düzgün yanaşma deyil, əksinə, müəllim və tələbələrin saatlarla vaxt itirməsi ilə nəticələnə bilər.

Ona görə də, düşünürəm ki, konkret bir qərar qəbul edilməlidir. Ya vaksin olunmalısan, ya da vaksin olunmalısan. Bunun başqa variantı yoxdur.

Biz düzgün maarifləndirməliyik ki, süni şəkildə yoluxma sürəti artmasın. Doğru şəkildə maarifləndirmə aparsaq, hesab edirəm ki, hər hansı kampaniyanın təşkil edilməsi vaksinləşmə ilə bağlı təhsilin keyfiyyətinə təsir göstərməyəcək. İnsanlar nəyinsə qarşılığında yox, sağlamlıqlarını düşündükləri üçün bunu edəcəklər. Bu səbəbdən ən yaxşı üsul, təbii ki, maarifləndirmə və məhdudiyyətlərin tətbiq edilməsidir".

ZAİRA AKİFQIZI

Telegramda izləyin

instagramda izləyin