BAYRAM HAZIRLIĞI: Qurbanlıq harada kəsilməlidir?

Yolçu Xanvəli: "İnsanların gözü qabağında heyvan kəsilməsi düzgün deyil"

Nərgiz Qaravəliyeva: "Bu uşaqlar üçün qorxunc mənzərədir"

Azərbaycanda bu il Qurban bayramı 12 sentyabr tarixinə təsadüf edir. Bayramla əlaqədar iki gün - 12-13 sentyabr tarixləri qeyri-iş günləri elan edilib.Qaydaya görə, qurban kəsilən heyvan sağlam və kök olmalıdır. Xəstə, arıq və qüsurlu heyvanlar qurbanlığa məqbul sayılmır. Qoyun, keçi, öküz, inək və dəvəni qurban kəsmək olar. Bu heyvanlar müəyyən yaş həddinə çatmalıdır. Keçi və qoyunun ili tamam olmalı, öküz və inək bir və ya iki ildən artıq, dəvənin isə beş ili tamam olmalıdır.

Qurban əti üç hissəyə bölünməklə əsasən fəqir və kasıblara paylanılmalıdır. Ət almaq imkanı olmayan fəqirlərə qurbanlıq verilməsi xüsusilə, nəzərə alınmalıdır.

Artıq neçə illərdir ki, dövlət qurumları tərəfindən müəyyənləşdirilmiş ət kəsimi məntəqələrində qurbanlar kəsilir. Bu məntəqələrdə heyvanların kəsilməsi qapalı şəraitdə həyata keçirilir. Bununla yanaşı şəhərin mərkəzində, dayanacaqlarda, bazarlarda, bir sözlə, ictimai yerlərdə uşaqların gözü qabağında qurbanlar kəsilir və qan axıdılır. Heyvanların hamının, xüsusən də azyaşlı uşaqların gözü qarşısında kəsilməsi ictimaiyyəti ciddi narahat edir. Neçə illərdi bu məsələ qaldırılsa da dövlət qurumları tədbir görmür. Çox güman ki, bu il də heyvanlar uyğun olmayan yerlərdə kəsiləcək.

"Heyvanlar qapalı yerlərdə kəsilməlidir
Ekspertlər hesab edir ki, ümumiyyətlə, qurbanların ictimai yerlərdə və uşaqların gözü qarşısında kəsilməsi məsləhət deyil. Çünki gün ərzində xeyli sayda qurbanlıq heyvanlarının qanı axıdılır, heyvan başları və dəriləri yol kənarına qalaqlanır. Bu mənzərə uşaqlar üçün heç də xoş mənzərə deyil. Eyni zamanda bir kəsim məntəqəsində yüzlərlə heyvanın qanının axıdılması uşaqların psixoloji durumuna mənfi təsir göstərir.

Kənd Təsərrüfatı Nazirliyi yanında Dövlət Baytarlıq Xidmətinin mətbuat katibi Yolçu Xanvəli "Cümhuriyət" qəzetinə bildirib ki, Qurban bayramında təçşkil olunan ət kəsimi və satışı məntəqələri qapalı şəraitdə fəaliyyət göstərir:

"Göz qabağında heyvanların kütləvi kəsilməsi küçə ticarəti ilə məşğul olanlara aiddir ki, onlarla da hər zaman mübarizə aparılıb. Bu tək bizim mübarizəmizlə yekunlaşmır. Buna yerə icazə verənlər, hüquq-mühafizə orqanları, yerli icra nümayəndələri, bələdiyyələr nəzarət etməlidirlər. İstər hamilə qadın, istər uşaq, istərsə də yaşlı insanların gözü qabağında heyvan kəsilməsi düzgün deyil. Bizim 10 məntəqəmiz var və orada heyvanlar qapalı şəraitdə kəsiləcək".

"Uşaqlarda aqressivlik yaradır"
psixoloq Nərgiz Qaravəliyeva "Cümhuriyət" qəzetinə bildirib ki, qurbankəsmə mərasiminin uşaqların gözü qarşısında həyata keçirilməsi düzgün deyil:

"Hətta bəzən görürük ki, qoyun kəsilərkən onun gözündən yaş axır. Bu mənzərə, həmçinin kütləvi heyvan kəsilməsi, heyvan kəsilərkən bıçağın onun boğazına dirənməsi, axıdılan qan uşaqlar üçün qorxunc mənzərədir. Belə görüntü uşaqların aqressivliyini daha da fəallaşdıra bilər. Həm də uşaqlarda qorxu hissi yarana bilər. Qorxu nəticəsində içinə qapana bilərlər. Ya da aqressivləşib qəddarlaşa bilərlər. Bu proseslər isə uşaqların psixoloji durumuna təsir edə bilər".

Psixoloqun sözlərinə görə, indiki dövrdə bütün insanların vəziyyətdən asılı olmayaraq əsəbləri oyaqdır: "Nevrozluq daha da artıb. Bu da insanların əsəblərinin daha da oyanmasına, ümumilikdə psixologiyasına mənfi təsir edə bilər. Yaxşı olardı ki, bu mərasimlər qapalı məkanlarda həyata keçirilsin və əsəbləri zəif olan insanlar belə mərasimlərdə iştirak etməsin. Əsəbləri zəif olan uşaq və yeniyetmələr bu mənzərə ilə qarşı-qarşıya qalmasınlar.

Psixoloq Qurban bayramının bəzi şərtlərinin uşaqlara başqa formada çatdırılması vacibliyini də qeyd edib. O deyib ki, uşaqlara bayram belə anladılmalıdır:

"Yaxşı olar ki, uşaqlar ət kəsiləndən sonra ətin paylanılmasında iştirak etsinlər. Ət paketlərdə uşaqlara verilsin və paylanılanda verdikləri şəxsi təbrik etsinlər. Bu uşaqlar üçün xoş olar. Həmçinin eqoist böyüyən uşaqlarda bir daha mərhəmət, xeyirxahlıq və vicdan kimi hissələri yaratsın. Bilirsiniz ki, indiki uşaqlar bir az eqoist böyüyür. Onlara paylaşmaq hissini aşılasınlar. Uşaqlarda rəhm hissini inkişaf etdirmək üçün paylaşma hissini onlarla birlikdə etmək olar"

Telegramda izləyin