Həyat yoldaşına qaraciyərini bağışladı: "Canım idi, ciyərim oldu"

Şanlıurfalı Necmettin Şen uzun illərdir sağlamlıq problemi yaşayan həyat yoldaşı Makbule Şenə qaraciyərini bağışlayaraq onun yenidən həyata qovuşmasına səbəb olub.

Sonxeber.az türk mediasına istinadən xəbər verir ki, Diyarbəkirin Çermik rayonunda yaşayan Makbule Şen 17 ildir davam edən səhhət problemləri səbəbilə Harran Universiteti Xəstəxanasının Qastroenterologiya şöbəsinə müraciət edib. Eyni ailədən olan 9 bacı-qardaşdan 3-də müşahidə edilən Wilson xəstəliyi səbəbindən uzun müddət müalicə alan Makbule Şenin vəziyyəti son zamanlar ağırlaşıb və o, yenidən xəstəxanaya yerləşdirilib.

Aparılan tibbi müayinələr nəticəsində Makbule Şenə qaraciyər köçürülməsinin vacibliyi müəyyən edilib. Bu zaman onun həyat yoldaşı Necmettin Şen donorluq üçün könüllü olub.

Harran Universiteti Xəstəxanasının Ümumi Cərrahiyyə kafedrasının müəllimi və Orqan Nəqli Mərkəzinin rəhbəri professor doktor Faik Tatlı və rəhbərlik etdiyi tibbi heyət tərəfindən həyata keçirilən əməliyyat zamanı donor olan ərindən alınan qaraciyərin yarısı Makbule Şenə uğurla köçürülüb.

Əməliyyatın uğurla başa çatdığı bildirilir. Necmettin Şen həyat yoldaşı ilə bağlı duyğularını "O, mənim canım idi, indi isə ciyərim oldu" sözləri ilə ifadə edib.

Telegramda izləyin