Kütləvi dava: Biri polis olmaqla, 3 nəfər yaralandı - ANBAAN VİDEO

Musiqi salonunda başlayan dava, daha sonra məhkəmə binasında və xəstəxananın qarşısında davam edib.

Sonxeber.az-ın "Haber Global"a istinadən verdiyi məlumata görə, hadisə Türkiyənin Aydın şəhərində baş verib.

Belə ki, 4 nəfərlik bir qrup insan əyləncə üçün musiqi salonuna üz tutub. Bir müddətdən sonra hesab istəyən müştərilər ofisiantın gətirdiyi 500 TL (təxminən 89 manat) hesaba etiraz ediblər. Narazılıqla başlayan mübahisə davaya çevrilib.

Davadan sonra məkanı tərk edən müştərilər hadisədən bir gün sonra şikayət üçün məhkəmə binasına gediblər. Şikayət barədə xəbər tutan salonu sahibləri də məhkəmə binasına gələrək həmin adamlarla yenidən əlbəyaxa dava ediblər.

Hadisədən sonra nəzarətə alınan 10 şübhəli şəxs müayinə üçün xəstəxanaya aparılıb. Dava orada da davam edib. Hadisə zamanı musiqi zalının sahibi Cuma Kocaman polis məmurunun belindən tapançanı götürərək atəş açmağa başlayıb. Təsadüfi atəş nəticəsində polis əməkdaşı H.G. qolundan, T.Y. adlı şübhəli şəxs isə ayağından güllə yarası alıb. Hadisə yerinə göndərilən çox sayda polis əməkdaşlarının müdaxiləsi nəticəsində münaqişə dayandırılıb.

Xəstəxananın təhlükəsizlik kameraları vasitəsilə anbaan qeydə alınan görüntüləri təqdim edirik:

Aysel Səfərzadə

Telegramda izləyin