"Azərbaycan-Türkiyə həmrəyliyi Ermənistanın havadarlarına bir mesaj idi" - Deputat

"Füzuli Beynəlxalq Hava Limanının açılışında Türkiyə Prezidenti cənab Rəcəb Tayyib Ərdoğanın iştirak etməsi bu hadisənin nə qədər əhəmiyyətli və tarixi xarakter daşıdığını göstərir".

Bu sözləri Sonxeber.az-a açıqlamasında deputat Cavanşir Paşazadə deyib.

O vurğulayıb ki, Türkiyə və Azərbaycan hər zaman bir-birinin yanında olub və bu gün qardaş ölkə ilə bütün sahələrdə əlaqələr davamlı yüksələn xətt üzrə inkişaf edir:

"Vətən müharibəsi başlayan ilk saatlardan Türkiyə Prezidenti Azərbaycanla həmrəyliyini ifadə etdi. Təbii ki, göstərilən bu həmrəylik Azərbaycanın haqq işinə müdaxilə etmək iddiasında olan Ermənistanın havadarlarına bir mesaj idi. Tarix boyu Türkiyə və Azərbaycan hər zaman bir-birinin yanında olublar.

Ümumiyyətlə, Türkiyə Prezidenti Rəcəb Tayyib Ərdoğanın iştirakı ilə Füzuli Beynəlxalq Hava limanının açılışının edilməsi müasir Azərbaycan tarixində unudulmaz səhifə açıb. Füzuli Beynəlxalq Hava Limanının açılışı Vətən müharibəsində qazandığımız qələbənin uğurlu nəticələrindəndir.

Digər tərəfdən, iki qardaş ölkənin liderlərinin bu açılışda iştirakı Qarabağın çiçəklənməsi üçün lazım olan investisiyaların cəlb edilməsinə kömək edə bilər.

Bundan əlavə, Rəcəb Tayyib Ərdoğanın Füzuliyə səfəri bütün dünyaya göstərdi ki, Azərbaycan öz ərazi bütövlüyünü bərpa edərək Cənubi Qafqaz regionunun reinteqrasiyasına kömək etmək üçün Füzulidə nəqliyyat qovşağı yaratmağa hazırdır. Türkiyə Prezidentinin Qarabağa növbəti səfəri bir daha sübut etdi ki, qardaş ölkə hər zaman Azərbaycanın yanındadır və bundan sonra da iki dövlət arasındakı münasibətlər yüksələn xətt üzrə davam edəcək".

Aysel Yusifqızı

Telegramda izləyin