Bu avtobusdan sərnişinlər ŞİKAYƏT EDİR

Redaksiyamıza 202 nömrəli avtobusla bağlı şikayət daxil olub.

Sonxeber.az-ın verdiyi məlumata görə, vətəndaş Nərimanov rayonunun Fətəlixan Xoyski küçəsində, Talassemiya Mərkəzi ilə üzbəüz yerləşən dayanacaqda 202 nömrəli avtobusun dayanmamasından şikayətçidir.

Onun sözlərinə əsasən, içində sərnişinlərin az olmasına baxmayaraq, adıçəkilən dayanacaqda saxlamayan avtobus həm də son bir ayda çox gec-gec gəlir.

Maraqlıdır, buna səbəb nədir?

Məsələ ilə bağlı Bakı Nəqliyyat Agentliyinin (BNA) mətbuat katibi Mais Ağayev saytımıza açıqlama verib.

O bildirib ki, bu xətt ən problemli xətlərdən biridir:

"Problemlərin olması ilə bağlı dəfələrlə daşıyıcı qarşısında məsələ qaldırılıb, onların həlli üçün tapşırıq verilib. Hazırda 202 nömrəli avtobus ilə sərnişin daşımaları "Çinar-Trans" MMC şirkəti tərəfindənn icra olunur. Problem aradan qaldırılmadığı təqdirdə onunla vidalaşacağıq, xətt başqa daşıyıcıya, yəni işini daha yaxşı görən bir şirkətə həvalə olunacaq".

Aysel Səfərzadə

Telegramda izləyin