"İlham Əliyevin rəhbərliyi sayəsində Azərbaycan XXI əsrdə qalib gələn yeganə dövlətdir"-POLİTOLOQ

İstiqamət: Müzəffər Ali Baş Komandanın rəhbərliyi ilə 44 günlük Vətən müharibəsində qazanılmış tarixi qələbə, Ermənistan tərəfindən törədilmiş sülh və insanlıq əleyhinə cinayətlər, habelə müharibə cinayətləri ilə bağlı həqiqətlərin dünya ictimaiyyətinə çatdırılması.

"Azərbaycanda belə bir tarixi şərait məhz İlham Əliyevin rəhbərlik etdiyi dönəmə təsadüf etdi. Bizim rəhbər son 300 il ərzində ilk dəfədir ki, dövlətçilik tarixində torpaq azad edən dövlət rəhbəri kimi tarixə düşdü".

Bu sözləri Sonxeber.az-a açıqlama verən Sosial Tədqiqatlar Mərkəzinin Mətbuat Xidmətinin rəhbəri, politoloq Əziz Əlibəyli deyib.

Onun sözlərinə görə, Qarabağı İlham Əliyevin dönəmində dünyaya gələn gənclər azad etdi:

"Yəni möhtərəm Ali Baş Komandanın hakimiyyəti dönəmində yeni ordu quruculuğuna keçildi, yeni dövlət inşa edildi. Bütövlükdə, bu bizim yeni bir dövlət mərhələmizdir. Bundan öncə, orta əsrlər tarixi boyunca şanlı imperiaların varisi olan Azərbaycan xalqının sonrakı dönəmi 300 il ərzində müxtəlif şəkildə parçalanması, müxtəlif işğallara məruz qalması və bizim xalq kimi formalaşmamızda dərin yaralar açması ilə yadda qaldı.

Hesab edin ki, 1918-ci ildə yaradılmış Cümuriyyət belə, ondan sonrakı dönəmdə Azərbaycan SSR-in təbii torpaq itkilərinə məruz qalması ilə müşayiət olundu. Ən pis ssenari ondan ibarət oldu ki, müxtəlif beynəlxalq liderlərin təsiri altında bizim torpaqlarımız hesabına erməni dövləti inşa edildi. Bu, azmış kimi, 1991-ci ildə SSRİ süquta uğradıqdan dərhal sonra, hətta süquta uğramamış, artıq 80-ci illərin sonundan Azərbaycan torpaqları ermənilərin silahlı anneksiyasına məruz qaldı.

Bütün bunların hamısı tarixi sınaq idi. Tarixi sınaqda biz böyük itkilərlə qarşılaşdıq. Amma sınağı durduran, şübhəsiz ki, dövlətin tam şəkildə süqut eləməsi ərəfəsində hakimiyyətə gələn Ulu öndər Heydər Əliyev oldu. Bu amilin üzərində xüsusi dayanmaq lazımdır. Çünki o dövrdə mərkəzi hakimiyyətə qarşı çıxışlar, o cümlədən xalqın parçalanması ehtimalları kifayət qədər güclü idi və birinci vəzifə ölkənin müstəqilliyini, dövlətçiliyi qoruyub saxlamaq idi.

Təsəvvür edin, 86.6 kv. km ərazinin 20 faizi işğal altında idi.

1918-ci ildə Cümuriyyət elan olunanda ərazimiz 113.1 kv. km idi. 27 minə yaxın ərazi tarixi şaraitdə itirilmişdi və onun da təxminən 16 min kv. km-ni 90-cı illərdən sonra işğal etdilər.

90-cı illərdən keçən 30 il ərzində bölgədə Qafqaza marağı olan bütün ölkələr, o cümlədən beynəlxalq münasibətlər sistemi bu yaradılmış şəraiti qəbul etməyə başladı. Uzun illər boyu ATƏT-in Minsk qrupu xətti ilə də təlqin etməyə çalışdılar ki, Azərbaycan işğal faktı ilə barışsın və ermənilərə bu ərazini güzəştə getmək məcburiyyətində qalsın.

Amma, xatırlayırsınızsa, 2001-ci ildə mərhum Heydər Əliyevlə "Ki-Uest" danışıqları da oldu. Həmin dönəmdə Ermənistan rəhbəri ilə ilkin razılıq əldə olundu və məsələnin həllinə dair tarixi şarait formalaşdı. Azərbaycanı müəyyən güzəştlərə razı salmaq istəsələr də, ölkəmiz nə qədər çətin vəziyyətdə ola da, iqtisadi baxımdan problemlər yaşasa da, böyük basqılar altında qalsa da, heç bir halda razılaşmaya getmədi.

Sonrakı dönəmdə, İlham Əliyevin hakimiyyəti zamanı dünyaya gələn gənclər nəhayət Qarabağı azad etdi.

Azərbaycançılıq, vətənpərvərlik hissi ilə böyüyən bir nəsil torpaqların işğal altında olması faktı ilə barışmadı. Bu, artıq bir çağırış, hətta tələb kimi ictimai normaya çevrildi. Sözsüz ki, ölkə rəhbəri bütün bünların hamısını nəzərə aldı. 2020-ci ilin tarixi şaraitinin yetişməsində də, təbii ki, Ali Baş Komandan İlham Əliyevin tarixi rolu oldu.

Eyni zamanda, o, bütün beynəlxalq aləmdə diplomatik olaraq doğru siyasət irəli sürdü. Ermənistanın işğalçı kimi tanınması ilə bağlı beynəlxalq təşkilatların qətnamələri oldu. Digər tərəfdən, ermənilər müttəfiqlərindən ayrıldı və artıq təkbətək müharibə eləmək imkanı əldə edildi. Ermənistanın hazırkı rəhbərinin və bundan əvvəlki başçılarının işğalçılıq faktı bütün dünyaya göstərildi, tam şəkildə müharibəni həyata keçirmək üçün hüquqi diplomatik hərbi baza hazırlandı.

44 günlük Vətən müharibəsi Prezident İlham Əliyevin bu sahədəki fəaliyyətinin kulminasiya nöqtəsidir.

Sosial Tədqiqatlar Mərkəzinin Vətən müharibəsindən dərhal sonra azərbaycanlılar arasında həyata keçirdiyi sorğuda təxminən 65 faiz insanlar etiraf etdilər ki, Vətən müharibəsi nəticəsində üzərimizdən "məğlub xalq" damğasının götürülməsi Prezidentimizin siyasətinin nəticəsində mümkün oldu.

Bu tarixi qələbə Ali Baş Komandan İlham Əliyev, xalq və ordu birliyinin yaratdığı "DƏMİR YUMRUQ"la əldə edildi.

İlham Əliyevin rəhbərliyi sayəsində Azərbaycan XXI əsrdə qalib gələn yeganə dövlətdir.

Onu da nəzərə alaq ki, bu, artıq 5-ci nəsil savaşıdır. İnformasiya-Kommunikasiya Texnologiyaları (İKT) nəzərindən baxsaq, bu, bir "ağıllı müharibə" fenomenidir. Yəni dünyada bu vaxta qədər "ağıllı müharibə" olmamışdı. Azərbaycan bu ilkə imza atmaqla bütövlükdə müharibəyə baxışları dəyişmiş oldu".

Material Azərbaycan Respublikası

dəstəyi ilə hazırlanmışdır.

ZAİRA AKİFQIZI

Telegramda izləyin