Bu siçan-pişik oyunu nəyə lazım?

Kubra Məhərrəmova yazır...

Son günlərin ən həyəcanlı xəbərləri çox təəssüf ki, Qazaxıstandan gəlir.

Hər gün bu iğtişaşlar nəticəsində ölən və yaralananların sayı artır. Yəqin ki, həyatda ən dəhşətli hadisə qardaşın əlindən ölməkdir. Çox təəssüf ki, Qazaxıstanda qardaş qanı tökülür.

Baş verənlər fonunda həmişə olduğu kimi kimlərsə xeyir tapacaq, ölüm və qan üzərindən xal yığacaq. Sahibinin yanında xal yığmağa çalışanlar isə neçə gündür sıraya düzülüb. Və bu xal yığanlar bunu o qədər həyasızcasına edirlər ki, ən riyakar adamda ürəkbulanma yaradır.

Siyahıda birinci Kremlin ruporu, "gözəllər gözəli" Marqarita Simonyandır. Tokayev kömək istəyən kimi "Rossiya Seqodnya" İnformasiya Agentliyinin rəhbəri, "Sputnik" agentliyinin baş direktoru Marqarita Simonyan şərtlər siyahısını dərc etdi. Krımı tanımaq. Kiril əlifbasına geri dönmək. Rus dili ikinci dövlət dili olsun. Rus məktəblərinə toxunulmasın. Anti-Rusiya mövqeli QHT-lər məhv olunsun. Millətçilərdən uzaq Rusiya ilə qardaşlıq siyasəti yürüdülsün. Sonda da yazıb ki, əks halda "Ибо неча", yəni kömək gözləməyin.

Məndən olsaydı sonunda orta əsrlərdə olduğu kimi illik xəracın da məbləğini yazardım. Ya da aylıq. Şərtlərə baxanda aydın olur ki, Marqaritanın yazdığı post çoxdan hazır imiş və komanda gələn kimi dərc edib. Sadəcə influenser kimi yaxşı seçim deyil. Kremlin texnoloqları daha cəlbedici, daha gözəl qadın seçsələr yaxşı olar. Çünki Marqaritanın ələyi göydə gəzir. Yeni, maraqlı obrazlara ehtiyac var.

Elə bu gecə bütün pravoslavlar İsa Məsihin doğum gününü qeyd ediblər. Moskvanın və Bütün Rusiyanın Patriarxı Kirill gecə liturgiyası zamanı Qazaxıstan torpağında sülh hökmranlığı üçün dualar oxuyub. Və bildirib ki, Qazaxıstan tarixən Rusiyanın ərazisidir. Buna görə də biz bu hadisələrə laqeyd qala bilmərik. Sən demə Kirill var gücü ilə dua edib. Bəllidir ki, var gücü ilə ona tapşırılan siyasi şərhi öz dini kürsüsündən eşitdirib.

Yadıma bizim din xadimlərinin ictimai-siyasi şərhləri düşdü. Aşağı-yuxarı hamısı eyni şeydir. Geyiməri təkcə fərqlidir. II Qarabağ Müharibəsi dövründə ağzından köpük çıxana qədər erməniləri müdafiə edən Dumanın deputatı Zatulin isə məsələyə başqa tərəfdən yanaşıb. O bildirib ki, Qazaxıstanda rus əsilli vətəndaşlara və rusdilli vətəndaşlara qarşı pantürklər tərəfindən təzyiqlər göstərilir. Və Rusiya öz "övladlarını" qorumalıdır. Bəs bütün bu iğtişaşları da türklüyü dəstəkləyən gənclərdir. Pişiyin quyruğu o qədər aşkar görünür ki?

Zatulin baş verən hadisələrə şərh verərkən daha da irəli gedərək bildirib ki, iştirakçıların çoxu Soros məktəbini keçənlərdir. Bu iğtişaşların səbəbi elə Nazarbayevin yürütdüyü siyasətdir. Nazarbayevin Rusiyanın qucağından qaçıb Qərbə getməsi, Qərb investorlarının ölkəyə cəlb edilməsi, yeni, gənc nəslin əsl Qazax, türk kimi tərbiyə etməsidir ki, bu gün Qazaxıstanda qardaş qanı axıdılır. Milli-radikal gənclər!

Kremlin "təlxəyi" Jirinovski isə bütün mümkün versiyaların üstündən xətt çəkib. Dumanın deputatı Vladimir Jirinovski "Exo Moskva"ya bildirib ki, "Nazarbayevə heç nə olmayacaq, çünki Moskva onun tam təhlükəsizliyinə zəmanət verir. O, Qorbaçov və Yeltsinin təqaüdə çıxdıqdan sonra aldığını alacaq".

O, həmçinin qeyd edib ki, Qazaxıstanın yeni prezidenti Tokayev Rusiyanın dostu olacaq. Açığı son günlər Nazarbayevin səsi-sorağı heç gəlmir. Haradadır, o da bilinmir? Bəlkə onun yerini elə Jirinovski bilir? Çünki bu qoca təlxəyin bilmədiyi işə qurd düşür. Özünü gicliyə vuraraq əsl məqsədi ortaya qoyur. Hamı onun dediklərini ciddi almadığı məqamda Kreml öz siyasətini yeridir.

Kremlin "bloqerləri" bu gün ən müxtəlif vəzifələrdə çalışsalar da özlərini tez ələ verirlər. Ya da qəsdən belə edirlər ki, "dayı"ları bəlli olsun. Sadəcə bu siçan-pişik oyunu nəyə lazım, onu bir deyən olsaydı. Aşağı-yuxarı hamının siçanı da, pişiyi də bilinir./oxu.az

Telegramda izləyin