İğtişaş zamanı həbs olunan musiqiçi azad edilib? - AÇIQLAMA
Bir müddət öncə Qazaxıstanda baş verən iğtişaşlar zamanı qırğızıstanlı musiqiçinin həbsi xəbəri yayıldı. Həmin şəxsin azad olunması ilə bağlı Qırğızıstan tərəfindən Qazaxıstana nota göndərildi. Hazırda o musiqiçi azad olunubmu?
Məsələ ilə bağlı Sonxeber.az-a Qırğızıstanın "Prudent Solutions" analitik mərkəzinin direktoru Esen Usubəliyev açıqlama verib.
O, bu sualın cavabını dəqiq bilmədiyini deyib:
"Bəziləri azad olunduğunu deyirlər, amma əksini deyənlər də var. Hələlik rəsmi məlumat daxil olmayıb.
Qanunsuz olaraq həbs edilən, hansısa mitinq iştirakçısı olmaqda və ya daha da pis - talançılıqda ittiham olunan musiqiçimizlə bağlı vəziyyət ilk olaraq sübuta yetirilməlidir. Bu şəxsin hər hansı mitinqlərdə iştirakına dair heç bir sübutun olmadığı sürəcə Qırğızıstan hökuməti hesab edir ki, ona qarşı irəli sürülən ittihamlar əsassızdır.
Xüsusilə vurğulamaq istəyirəm ki, Qırğızıstanda və Qazaxıstanda tanınmış musiqiçi olduğundan, ola bilsin ki, anlaşılmazlıq baş verib.
Biz Qazaxıstana kömək etməyə, onlara düşdüyü bu vəziyyətdən çıxmaq imkanı verməyə çalışırıq. Amma yenə də, baş verənlərə düzgün qiymət vermədən danışmaq çətindir.
Bir şeydə əminik ki, bu adam terrorist deyil və səhv iş görməyib. Onun haqqında terrorçu imiş kimi danışmaq, hər hansı bir iğtişaşda iştirakının sübutu olmadan, vaxtından əvvəl nəsə demək yanlış olar".
ZAİRA AKİFQIZI
Sonxeber.az Telegramda izləyin instagramda izləyin
Şikayətiniz varsa Whatsapp: 051 7028255
Facebookda Paylaş