Tofiq Musayev dünyanın ən məşhur turnirində nə vaxt döyüşə çıxacaq?

MMA döyüşçümüz Tofiq Musayevin dünyanın iki ən məşhur turnirindən biri olan "Bellator"da çıxış edəcəyi tarix bilinib.

Bu barədə Oxu.Az-a Tofiq Musayevin özü məlumat verib.

"Bellator"da hələ ki rəqibim bəlli deyil. Ancaq bağlanan müqaviləyə əsasən bir il yarım ərzində 4 döyüş keçirmək hüququm var. İlk döyüşüm fevralın sonu–martın əvvəlinə təsadüf etməlidir", - idmançı bildirib.

Qeyd edək ki, Tofiq Musayev bu turnirdə yüngül çəkidə mübarizə aparacaq. Onun rəqibləri bilinməsə də, hazırda bu turnirlə müqavilə bağlamış 8 döyüşçü onun rəqibi ola bilər. Onların arasında ləqəbi "Pitbull" olan braziliyalı Patriki Freyre də var. Tofiq məhz bu rəqibini 2019-cu ilin dekabrın 31-də Yaponiyada keçirilmiş Rizin Qran Pri turnirinin finalında məğlub edərək kəmər qazanıb.

Onu da bildirək ki, son açıqlanan reytinqdə Tofiq Musayev öz çəki kateqoriyasında dünyanın ən güclü 40 MMA idmançısından biri sayılır. O hazırda 39-cu, UFC-də çıxış edən Azərbaycan əsilli Rafael Fiziyev 11-cidir.

Telegramda izləyin

instagramda izləyin