Orfoqrafiya lüğətinin dəyişməsinə səbəb nədir? - AÇIQLAMA

Bütün başqa lüğətlər kimi, orfoqrafiya lüğətləri də öz dövrünün dil mənzərəsini əks etdirir. Odur ki, lüğətin tərtibi zamanı dilimizin bütün üslublarının lüğət tərkibləri nəzərdən keçirilir, işlənmə tezliyindən asılı olmayaraq, bütün sözlər, bu cərgədən bütün terminlər lüğətə daxil edilir. Dil, ilk öncə onun lüğət tərkibi daim inkişafda, dəyişmə halındadır. Ona görə də yazı dili normalarını təsbit edən lüğətlərin hər 5 ildə bir dəfədən az olmayaraq nəşr olunması nəzərdə tutulur. Orfoqrafiya lüğətinin son illərdə tez-tez dəyişməsinə səbəb nədir?

Məsələ ilə bağlı Sonxeber.az-a dilçi alim Şahlar Göytürk açıqlama verərək bu cür dəyişmələrin labüd olduğunu qeyd edib.

Onun fikrincə, hazırda dilimizə yeni sözlərin daxil olması, istədiyimiz, axtardığımız sözü asanlıqla tapmağımıza kömək edir:

"Orfoqrafiya lüğəti tərtib olunarkən bəzi sözlər cəmiyyətin müzakirəsinə verilməlidir və uyğun olan söz lüğtə salına bilər. Hazırda elə bir dövrdə yaşayırıq ki, istər jurnalist, istər müəllim və ya şagird - istənilən hər kəs hansısa sözü axtararkən internetdə onu asanlıqla tapa bilməlidir.

Ziyalı potensialı kifayət qədərdir, texniki cəhətdən müəyyən problemlər var ki, onların həlli yazılanların elektron müstəviyə gəlməsinə, bununla da hər kəs üçün əlçatan olmasına yardım edəcək".

Qeyd edək ki, Azərbaycan dilinin orfoqrafiya lüğətinin yenidən tərtibatı ilə bağlı hazırlıq işlərinə başlanılıb.

Azərbaycan Milli Elmlər Akademiyasının (AMEA) Nəsimi adına Dilçilik İnstitutundan verilən məlumata görə, lüğət müasir informasiya texnologiyalarının imkanlardan istifadə edilməklə hazırlanacaq.

Xatırladaq ki, təkmilləşdirilmiş formada yeni lüğətin 2022-ci il ərzində çap olunması nəzərdə tutulub.

Aygün Osmanlı

Telegramda izləyin