"Yoluxma rekord həddə çata bilər"- Qapanmalarla bağlı infeksionistdən AÇIQLAMA

Son vaxtlar əhali arasında boğaz ağrısı, hərarət, halsızlıq çox müşahidə olunur. "Omicron" ştammına yoluxma fonunda bu kimi halların adi mövsümi qrip, yoxsa yeni ştamm olduğunu necə müəyyən etmək olar? Bildiyimiz kimi, ''Omicron" ştammı koronavirusun digər versiyalarına nisbətdə daha sürətlə yayılma tempinə malikdir. Əhali arasında yoluxma hallarının qarşısını almaq üçün hansı tədbirlər görülməlidir?

İnfeksionist Nicat Əzimli Sonxeber.az-a açıqlamasında bildirib ki, qarşıdakı həftələrdə, fevral ayının ortalarına yoluxma rekord həddə çata bilər, lakin "Omicron" variantının həyati təhlükəsi digərlərinə nisbətən daha azdır:

"Bu hal insanlarda, təəssüf ki, arxayınlıq yaradır. Bu isə düzgün deyil. Çünki bəzi yanaşı xəstəlikləri olanlar, yaşlı insanlar xəstələndikdə ağırlaşmalar olur. "Omicron" variantının simptomları təxminən bir həftə müddətində olur. Bu ştammın əsas simptomları xəstəliyin patogenezi ilə əlaqədar olub, daha çox yuxarı tənəffüs yolları ilə bağlıdır.

Simptomlar elə qrip əlamətləri kimi də özünü göstərir. Burun-boğazda diskomfort, selikli qişaların iltihabı, boğaz ağrısı, boğaz qıcıqlanması, quru öskürək, bəzən kataral əlamətlərin bakterial infeksiyaya keçməsi nəticəsində bəlğəmli öskürək də müşahidə oluna bilir. Çox zaman ilkin olaraq qızdırma ilə özünü biruzə verir. Xəstələrin 68%-də baş ağrısı ilə başlayır.

Uşaqlarda da xəstəliyin gedişatı böyüklərdə olduğu kimidir. Burada bir məqam var ki, bağçalarda, məktəblərdə uşaqlar bir-birilə sıx təmasda olduğu üçün onlar arasında yoluxma halları daha çox olur. Daha sonra həmin uşaqların ailə üzvlərində də yoluxma müşahidə olunur."

Qapanmaların olub-olmayacağı ilə bağlı sualın cavabında isə həkim bildirib ki, epidemik vəziyyət səhiyyə və digər sektorlara çox kəskin təsir göstərsə, qapanma ola bilər:

"Belə olduqda Operativ Qərargah müvafiq qərar qəbul edəcək. Vaksinasiya, gigiyena qaydalarına riayət, maskanın taxılması və sosial məsafənin saxlanılması bu ştamma yoluxmanın qarşısını nisbətən ala bilir. Buster dozanın vurulması, xəstəliyin yüngül keçirilməsinə səbəb olur".

Aygün Osmanlı

Telegramda izləyin