Nazirlikdən mühüm QƏRAR: Azərbaycanda daxili çempionatlar canlı yayımlanacaq - FOTO

Gənclər və İdman Nazirliyi bundan sonra ölkədə keçirilən daxili idman yarışlarını canlı yayımlayacaq.

Bu barədə Oxu.Az-a Gənclər və İdman Nazirliyinin mətbuat katibi Qabil Mehdiyev bildirib.

"Artıq bu gün saat 18:00-dan etibarən ilk belə işimizə başlayacağıq. Qadın voleybolu üzrə ölkə çempionatının VI turu çərçivəsində "Azərreyl" – "UNEC" qarşılaşması rəsmi "Facebook", "Instagram" səhifələrimizdə və "YouTube" kanalımızda canlı yayımlanacaq. Bundan sonra da televiziya ilə göstərilməyən digər idman növləri üzrə Azərbaycan çempionatlarının canlı yayımlanmasını təşkil etməyi planlaşdırırıq".

O bildirib ki, oyunlar 3 kamera vasitəsilə çəkiləcək:

"Yayım peşəkar şəkildə qurulacaq, rejissor olacaq. Oyun fasiləsi və sonrası açıqlamalar təşkil edəcəyik. Voleybol mütəxəssisi kimi baş koordinator Zöhrab Gözəlbəylini dəvət edəcəyik. Oyunun aparıcısı isə nazirliyin əməkdaşı Nərmin Əhmədova olacaq.

Bildiyiniz kimi, pandemiya ilə əlaqədar olaraq qapalı zallara azarkeşlər buraxılmır. Ona görə də biz istəyirik ki, azarkeşlər bu oyunlardan kənar qalmasın və bizim vasitəmizlə qarşılaşmaları izləmək imkanı əldə etsinlər".

Qeyd edək ki, oyun Facebook.com/mysofficial, Instagram.com/gencleridmannazirliyi, Youtube.com/c/genclerveidmannazirliyi səhifələri vasitəsilə canlı yayımlanacaq.

Telegramda izləyin