"Bir ölkə məhv olur, ailələr öz evlərini tərk edir" - Ukrayna əsilli aktrisa Milla Yovoviç

Ukraynada baş verənlər bütün dünyada dəhşətlə izlənilir. Siyasətçilər, mədəni xadimlər, məşhurlar tezliklə sülhün bərqərar olmasının tərəfdarı olduqlarını bildirirlər.

Sonxeber.az xarici mətbuata istinadən xəbər verir ki, Ukrayna əsilli əfsanəvi rus aktrisa Milla Yovoviç də hadisələrə biganə qala bilməyib.

Kiyevdə doğulan Millanın atası çernoqoriyalı həkim. anası isə rus aktrisa olub.

Uşaqlıq şəhərinin bombardman olmasını təəssüflə izləyən aktrisa sosial şəbəkədə bu sözləri yazıb:

"Ürəyim parça-parça olur. Bu günlərdə Vətənim Ukraynada baş verənləri dərk etməyə çalışıram. Mənim ölkəmin, mənim xalqımın başına bombalar yağır. Mənə yaxın olan insanlar qaçmaqla xilas olmağa çalışırlar.

Mənim köklərim həm Rusiyada, həm Ukraynadadır. Ona görə ikiyə parçalanıram və baş verən dəhşəti qəbullana bilmirəm.

Milyonlarla insan əzab çəkir! Ailələr illərlə yaşadıqları məkanları tərk edib, hara oldu qaçırlar".

Aktrisa tarixin təkrarlandığını və keçmiş Yuqoslaviyada baş verənlərin hazırda Ukraynada müşahidə olunduğunu vurğulayıb:

"Burada həmin şeylər təkrarlanır. Zahirdə xeyirxah, lakin əslində sülh haqqında heç düşünməyən siyasətçilər. Yeni-yeni həyatları açgözcəsinə "udmağa" çalışan imperializm.

Bunların bədəlini isə sadə insanlar ödəyir, acı göz yaşlarıyla..."

Ulduzun fikirlərini səmimi qəlblə dəstəkləyirik. Vəziyyət, həqiqətən də, dəhşətlidir. Kimin ağlına gələrdi ki, XXI əsrdə Avropada belə bir hadisə baş verə bilər? Milla Yovoviçin də dəhşətə gəlməsi təəccüblü deyil.

Natəvan Baxşiyeva

Telegramda izləyin