"Hər iki tərəfin itkiləri çoxdur" - Deputatdan AÇIQLAMA

"Bildiyimiz kimi, bu məsələyə Cənab Prezident öz fikrini, Hikmət Haciyev də Azərbaycanın mövqeyini bildirib. Azərbaycanın mövqeyi ondan ibarətdir ki, hər bir dövlətin öz suverenliyinə, ərazi bütövlüyünə hörmətlə yanaşılmalıdır".

Bu sözləri Sonxeber.az-a açıqlamasında Elm və təhsil komitəsinin üzvü, deputat Ceyhun Məmmədov deyib.

O bildirib ki, Azərbaycan öz siyasətində bu məsələyə prioritet bir istiqamət kimi önəm verir:

"Burada görünən odur ki, proseslər hələ davam edir və Azərbaycan da bununla bağlı öz addımlarını atır. Ölkəmiz Ukraynaya humanitar yardım göstərdi. Əlbəttə, biz bilirik ki, hər bir müharibə xalqlara faciə gətirir. Ukraynada həm də çoxlu sayda insan həyatını itirib.

İstəyimiz ondan ibarətdir ki, bu proses sürətlə yekunlaşsın və iki dövlət arasında münasibətlər normallaşsın.

Ümumi təhlil göstərir ki, hər iki tərəfin itkiləri çoxdur. Bu da yaxın perspektivdə yaxşı heç nə vəd etmir. Biz istərdik ki, daha çox danışıq yolları ilə, müzakirələr aparılaq müharibəyə son qoyulsun və dövlətlər arasında münasibətlər normallaşsın".

ZAİRA AKİFQIZI

Telegramda izləyin