Bu uşaqlarda 3 yaşdan sonra nitqdə gerilik müşahidə oluna bilər - Loqopeddən AÇIQLAMA

Müasir dövrdə nevroloji, psixi xəstəliklərlə və psixoloji problemlərlə yanaşı nitq qüsurları da aktuallıq təşkil edir. Bəs bu problemlə necə mübarizə aparılmalıdır?

Mövzuyla bağlı Sonxeber.az-a defektoloq loqoped Rufa Mirişli açıqlama verib.

Onun sözlərinə görə, loqopedlərə müraciət səbəbi yalnız səslərin korreksiya olunmasından ibarət olmamalıdır:

"Loqopedlərdən böyük məsuliyyət və işlərində peşəkarlıq tələb olunur. Əgər uşağınızın 3 yaşına kimi nitqində heç bir irəliləyiş müşahidə olunmursa, loqoped konsultasiyası mütləqdir. Loqopedik konsultasiya zamanı nitqin anlaması, söz ehtiyatı, cümlələrin qurulmasının inkişafına diqqət yetirilir. Erkən yaşdan başlanılan düzgün müdaxilə problemin aradan qalxmasının ilkin mərhələsidir. Əgər 3 yaşa kimi loqopedik, psixopedoqojik dəstək olmazsa, 3 yaşdan sonra nitqdə gerilik müşahidə oluna bilər.

Hər bir valideynin istəyi uşağının sağlam inkişafıdır. Əfsuslar olsun ki, bəzən hər hansı bir səbəbdən inkişafında problemlərlə rastlaşanlar olur. İşini bilən həkimlər, psixoloqlar, loqopedlər, pedaqoqlar valideyn dəstəyi ilə bu problemin aradan qalxmasına köməklik edirlər. Çünki kompleksli iş təkcə mütəxəssislərdən ibarət olmur, valideynlərin səbrli dəstəyi işin uğurlu hissəsindən biri hesab olunur.

Hörmətli valideynlər, uşaqlarınızın nitqinin inkişafına ən böyük dəstəkçi sizsiniz!"

Aysel SƏFƏRZADƏ

Telegramda izləyin