"Kommunal xidmətlərin qiyməti ən azı 3 il dondurulmalıdır" - Elşad Məmmədov

"Süni qiymət artımına İqdisadiyyat Nazirliyi tərkibində faəliyyət göstərən qurum nəzarət etməlidir. Hesab edirəm ki, istehlak bazarındakı inhisar meyillərinə, süni qiymət artımlarına onlar baxmalı və bu proseslərin qarşısını mümkün qədər almalıdırlar".

Bu sözləri Sonxeber.az-a açıqlamasında UNEC-in Professoru Elşad Məmmədov deyib.

O bildirib ki, Azərbaycandakı inflyasiyanın, qiymət artımının xeyli hissəsi ölkə iqdisadiyyatının idxaldan aslılığı ilə bağlıdır:

"Düşünürəm ki, biz idxaldan kritik dərəcədə asılıyıq. Dünya bazarındakı qiymət artımı Azərbaycana da təsir edir.

Ona görə də birinci idxaldan asılılığın azaldılması reallaşdırılmalıdır. Bunun üçün biz daha çox istehsal etməliyik. Daha çox istehsal etmək üçün isə iqdisadiyyatımıza daha çox investisiya yatırmalıyıq.

Amma təəssüf ki, Azərbaycanda investisiyaların həcmi, zənnimcə, azalır və bu da kredit siyasəti ilə bağlıdır. Kredit faizləri əlçatmazdır və bütün bunlar idxaldan asılı olmağımıza səbəb olur.

Biz iqdisadi cəhətdən qonşu ölkələrlə inteqrasiyaya getməliyik. Kənd təsərrüfatı istehsalçılarının əsas bazarı olan Bakı bazarına çıxışı kifayət qədər mürəkkəb və məhduddur.

İnhisarçı qurumlar, faktiki olaraq, ticarət şəbəkələrində öz şərtlərini diktə edirlər, nəticədə isə uduzan istehsalçı, alıcı, sonda da dövlət olur.

Ona görə də, ticarət şəbəkələrində inhisar meyillərinin qarşısı alınmalıdır.

Unutmayaq ki, ötən il kommunal xidmətlərin qiymətində xeyli dərəcədə bahalaşma oldu. Bu, 1-2 həftəyə hiss olunmur, bazara tədricən təsir edir.

Suyun, işığın və s. bahalaşması, sözsüz ki, inflyasiyanı artıran amillərdəndir.

Mənə elə gəlir ki, kommunal xidmətlərin qiyməti ən azı 3 il dondurulmalıdır.

Bu məsələlərin reallaşdırılmasına ehtiyac var. Əks halda, xüsusilə idxaldan aslılığımızı azaltmasaq, dünya bazarında baş verən prosesləri nəzərə aldıqda, ərzaqlar bahalaşacaq. Düşünürəm ki, dediklərimi reallaşdırmasaq, inflyasiya kəskin artacaq".
ZAİRA AKİFQIZI

Telegramda izləyin