Bayram günləri ilə bağlı Vaqif Əsədovdan AÇIQLAMA - ÖZƏL

"Şənbə-bazar və ya bayram günlərinin olmasından asılı olmayaraq, yol hərəkətində təhlükəsizliyin təmin edilməsi, asayişin qorunması hər zaman polis əməkdaşlarının diqqətində olub və onlar bu istiqamətdə məsuliyyət və qayğı ilə xidmət göstərirlər. Bunu, yəqin ki, bu gün rahat nəfəs alıb, hərəkət edən hər bir vətəndaşımız təsdiqləyər".

Bu sözləri Sonxeber.az-a Bakı Şəhər Baş Dövlət Yol Polisi İdarəsinin ictimaiyyətlə əlaqələr şöbəsinin rəisi, polkovnik Vaqif Əsədov açıqlamasında deyib.

O bildirib ki, hər il olduğu kimi, bu il də bayram günləri ilə əlaqədar insanların istənilən istiqamətdə hərəkət etməsi, istirahət mərkəzlərinə, bölgələrə, ata-baba yurdlarına getməsi gözlənilir və bu istiqamətdə təhlükəsizliyin təmin edilməsi üçün müxtəlif tədbirlərin həyata keçirilməsi zərurəti yaranır:

"Hər zaman olduğu kimi, polis gücləndirilmiş iş saatı ilə xidmət edəcək. Bakı şəhəri üzrə yol polisinin əməkdaşları səfərbər edilib. Paytaxtın küçə və prospektləri, enişli yoxuşlu yolları, sərt döngələrinin tərəfimizdən tam nəzarətə götürüməsi təşkil edilib.

Qəza hadisələrinin baş verməməsi və istənilən istiqamətdə süni sıxlığın, tıxacların yaranmaması üçün bir daha sürücülərimiz diqqətli olmalı, yol hərəkəti haqqında qanunun tələblərinə uyğun hərəkət etməyə üstünlük verməlidirlər. Bununla həm özlərinin təhlükəsizliyi təmin olunar, həm də digərlərinin hərəkətinə manə yaranmaz.

Qeyd edək ki, tədbirlərin keçirildiyi ərazilərdə əməkdaşlarımız xidmət edəcəklər. Lakin hər bir halda, sürücü, piyada, sərnişinlərimiz və digər hərəkət iştirakçıları da yol hərəkətinin təhlükəsizliyinin təmin edilməsi üçün diqqətli olmalı və bu tələbləri düzgün yerinə yetirməlidirlər.

ZAİRA AKİFQIZI

Telegramda izləyin