Azərbaycanlı aktrisanın geyimi Uma Turmanın "Oscar" təqdimatındakı geyiminə bənzədildi - FOTO

Dünən AzTV-də "Qətl planı" filminin növbəti bölümü yayımlanıb. Salman Mumtaza həsr olunan bu bölümdə onun həyat yoldaşı Zeynəb xanımı canlandıran İlahə Tofiqqızının geyimi məşhur Hollivud ulduzu Uma Turmanın dünən "Oscar" mükafatının təqdimat mərasimi üçün seçdiyi "Bottega Veneta" brendinə məxsus geyimi ilə müqayisə olunub.

Sonxeber.az BiG.AZ-a istinadən xəbər verir ki, İlahə Tofiqqızının stili üzərində əməkdar rəssam Mehriban Əfəndi işləyib.

Geyim izləyicilər tərəfindən bəyənilib. Bəzi izləyicilər onun hətta amerikalı aktrisanın geyimindən daha gözəl olduğu bildiriblər.

Qeyd edək ki, "Azərbaycan Televiziya və Radio Verilişləri" QSC-nin "Qətl planı" adlı televiziya layihəsi bədii-sənədli filmlər silsiləsindən ibarətdir. "Qətl planı" filminin rejissoru Elnur Əliyev, quruluşçu-rəssamı Mehriban Əfəndidir.

Çəkilən bədii-sənədli filmlərin qəhrəmanları faciəvi ölümü ilə tarixə düşmüş ictimai-siyasi, mədəniyyət və elm xadimləridir.

Filmlərdə həm orta əsrlərdə, həm də 19, 20-ci əsrlərdə yaşamış və bu kontekstə uyğun şəxsiyyətlərin obrazları canlandırılıb.

Bundan başqa, "Qətl planı"nda tamaşaçılar qətlə yetirilmiş Cümhuriyyət xadimləri, repressiya qurbanları və müasir dövrdə faciəvi şəkildə dünyadan köçən ziyalılar, alimlər, ictimai-siyasi xadimlər barədə ətraflı məlumatlar əldə edə bilərlər.

Telegramda izləyin