"Bu şəxsə qarşı ciddi ölçü götürülməli, cəzasını almalıdır" - Millət vəkili - ÖZƏL

"Rusiya Dövlət Dumasının deputatı Mixail Delyaginin KİV-də Azərbaycanla Rusiya arasındakı qarşılıqlı münasibətlərin ruhuna və prinsiplərinə zidd mövqe tutması, bu barədə etdiyi neqativ çıxışları ilə bağlı Baş Prokurorluqda araşdırma aparılması gözlənilən idi".

Bu sözləri Sonxeber.az-a açıqlamasında Milli Məclisin deputatı Aydın Hüseynov deyib.

O bildirib ki, Mixail Delyaginin "Rossiya-1" kanalında etdiyi çıxış suveren ölkəyə qarşı təcavüzə çağırış, terrorçuluğa, milli, irqi, dini nifrət və düşmənçiliyə təşviqdir:

"Azərbaycan öz suveren ərazilərində antiterror əməliyyatı keçirir. Bu barədə müvafiq strukturlar da məlumatlandırılıb. Azərbaycan, Rusiya və Ermənistan liderlərinin imzaladığı üçtərəfli bəyanatın 4-cü maddəsinə uyğun olaraq, Qarabağda qanunsuz erməni silahlı birləşmələri mövcud olmamalıdırlar. Buna baxmayaraq, bəzi dairələr Azərbaycanın daxilində yenidən vəziyyəti gərginləşdirməyə, Qarabağ iqtisadi rayonunda separatçı tör-töküntüləri aktivləşdirməyə cəhdlər edirlər. Azərbaycanın da həmin terrorçulara qarşı əməliyyatlar aparması tam qanunauyğundur. Delyagin kimi separatizmi dəstəkləyən "siyasətçilər"in destruktiv əməli barədə öz ölkələrinin müvafiq qurumları da xəbərdar olmalıdırlar.

Azərbaycanla Rusiya arasında ötən ay müttəfiqlik müqaviləsi imzalanıb. Həmin müqavilədə hər iki tərəfin suveren ərazisində antiterror əməliyyatının keçirilməsi zamanı bir-birini dəstəkləməsi barədə maddə də var. Yəqin ki, Dövlət Dumasının komitə sədrinin müavini olan Delyaginin bu sənəddən xəbəri olmamış deyil. Bir daha vurğulayırıq ki, bu şəxsə qarşı ciddi ölçü götürülməli, o, cəzasını almalıdır.

Bildiyiniz kimi, Azərbaycanın Baş Prokurorluğunda rusiyalı deputata qarşı Cinayət Məcəlləsinin bir sıra maddələri ilə cinayət işi başlanılıb və məhkəmənin qərarı ilə barəsində həbs qətimkan tədbiri seçilməklə İNTERPOL vasitəsilə beynəlxalq axtarış elan edilib. İnanırıq ki, haqq-ədalət öz yerini tutacaq, separatizmi, terrorçuluğu dəstəkləyən, digər ölkənin suveren hüquqlarına qarşı çıxan şəxslərə qarşı ciddi ölçü götürüləcək".

Aysel SƏFƏRZADƏ

Telegramda izləyin