Mask atomla bağlı dünyaya ÇAĞIRIŞ ETDİ

"Tesla"-nın rəhbəri Elon Mask bildirib ki, bəzi ekoloqlar atom elektrik stansiyalarının bağlanmasını müdafiə etdikləri üçün "qeyri-insani" davranırlar.

O, bu barədə özünün tviter səhifəsində məlumat verib.

"Dünya ölkələri atom enerjisi istehsalını artırmalıdır! Atom elektrik stansiyalarının bağlanması milli təhlükəsizlik baxımından dəlilikdir. Ətraf mühitə zərər verən onların bağlanmasıdır" - deyə milyarder qeyd edib.

Hazırda dünyanın bir çox ölkələri bərpa olunan enerjinin güclü mənbəyi olan nüvə enerjisindən tədricən imtina edir. Bununla belə, ekspertlər Çernobıl və Fukusima AES-lərində baş verən qəzalardan sonra onun təhlükəsizliyi ilə bağlı narahatlıq keçirirlər.

Mask keçmişdə nüvə enerjisindən bərpa olunan mənbə kimi istifadənin güclü tərəfdarı olub. Bu ilin mart ayında "Business Insider"-ə verdiyi müsahibədə Mask təkcə atom elektrik stansiyalarını bağlamamağa deyil, həm də artıq bağlananları yenidən açmağa çağırıb.

Onun sözlərinə görə, bu, ilk növbədə kütləvi təbii fəlakət riski olmayan ölkələrdə edilməlidir. O, digər bərpa olunan mənbələr daha etibarlı olana qədər nüvə enerjisinin lazım olduğu qənaətinə gəlib.

Telegramda izləyin