İdmançıdan gənclərlə bağlı TÖVSİYƏLƏR

Gənc kadrlarımızdan narazıyıq.

Biz, bir cəmiyyət olaraq, dövlətimizdən, yaşlı kadrların gənclərlə əvəz edilməsini xahiş etdik. Çünki məqsədimiz vətəndaşlarla rəhbər şəxslər arasında düzgün kommunikasiya sisteminin qurulması və onlara göstərilən xidmətlərin innovativ və alternativ olmasıdır. Dövlətimiz isə bizim xahişimizi nəzərə alıb "gənc kadrlılıq" siyasətini gücləndirərək, gənclərimizin mühüm sahələrdə təyinatlarını təmin etdi və etməkdədir.

Çox gözəl. Təşəkkür edirik! Belə də olmalıdır.

Amma təəssüf ki, bu gün bir çox gənclər xidmət göstərdiyi sahələrdə, vətəndaşlara "necə köməklik göstərmək olar "deyil, "necə çətinlik törətmək olar" prinsipləri üzərindən yanaşırlar. Bu mənzərəni təhsildə, idmanda , digər qurumlar və xidmət sahələrində müşahidə etmək olar.

Məsələn, bu yaxınlarda yaşadığım bir hadisəni qeyd etmək istəyirəm.

Beş ay idi ki, yaranmış problemi gənc kadrlar əlindən həll edə bilmədiyim halda, eyni qurumda xidmət göstərən yaşlı bir ağsaqqalımız beş dəqiqədə, qanuni və alternativ yolla həll etdi.

Halbuki qeyd olunan məsələnin həlli mexanizmini dəfələrlə onlara deyirdim.

Belə çıxır ki, onlar cəmiyyəti göstərdiyi təşəbbüsə görə məyus edirlər.

Təbii ki, biz bunu bütün gənc kadrlara da şamil edə bilmərik. Məncə, onlar, bu tərzləri ilə absurd avropa rejimi nümayiş elətdirirlər. Amma əslində bunu cəmiyyətə qarşı radikallıq kimi də qiymətləndirmək olar.

Əziz gənclər, bizim irsimizdə humanistlik olduğu halda, radikalizm bizə yaraşmaz. Axı dünyanın hər yerində olduğu kimi, bizim də qanunlarımızda (maddələrin bəndlərinə əsasən) nisbi fors-majorluq var ki, siz bu hallardan qanun çərçivəsində, pozitiv şəkildə istifadə edə bilərsiniz.

Sonda, bir idmançı və vətəndaş olaraq, gənc, ixtisaslı kadrlarımızın hər birini, döyüş meydanındakı gənclərimiz kimi, mübariz və cəmiyyətə yararlı olmasını arzu edirəm.

Dünya çempionu və idman eksperti Anar Süleymanlı

Telegramda izləyin