"Qəbul edilən yeni qanun cəmiyyətimizdəki demokratik prunsiplərin təzahürüdür"- Aydın HÜSEYNOV

"Bu ilin oktyabr ayında Milli Məclisdə "Siyasi partiyalar haqqında" yeni qanun layihəsinin ictimai müzakirəsinin keçirilməsi, müzakirələrdə parlamentdə təmsil olunan və parlamentdən kənar siyasi partiyaların nümayəndələrinin iştirak etməsi, siyasi partiyaların maliyyələşdirilməsi ilə bağlı maddənin dəyişməsi, siyasi partiya anlayışı, partiyaların təsis edilməsi və digər məsələlərin qanunvericilikdə konkret şəkildə göstərilməsi demokratik cəmiyyət üçün xarakterik, xas olan plüralizmin ölkəmizdə olduğunu və inkişafını təsdiq edir. Təbii ki, müzakirələrdə səslənən fikirlər, hətta iradlar belə ölkəmizin siyasi partiyalarla bağlı yeni qanun layihəsinin hazırlanmasına öz töhfəsini verəcək və deməli, Azərbaycanda plüralizmin, söz, fikir, məlumat azadlıqlarının bundan sonra da inkişafı barədə nikbin proqnozlar verməkdə hər kəs haqlıdır. Ona görə ki, Azərbaycanda fikir, söz və məlumat azadlığı, plüralizmin inkişafı təmin olunur".

Bunu Sonxeber.az-a açıqlamasında deputat Aydın Hüseynov deyib.

A.Hüseynov bildirib ki, Yeni Azərbaycan Partiyasının sədri, Prezident İlham Əliyevin təşəbbüsü və rəhbərliyi ilə ölkədə həyata keçirilən ardıcıl və sistemli islahatlar nəticəsində dövlət və cəmiyyət həyatında baş verən bu böyük dəyişikliklər prosesinə Milli Məclis qanunvericilik müstəvisində öz töhfəsini verməyə bilməzdi:

"Bildiyiniz kimi, Parlamentdə təmsil olunan siyasi partiya nümayəndələrinin "Siyasi partiyalar haqqında" yeni qanun layihəsinin hazırlanması ilə bağlı Milli Məclisin sədri Sahibə Qafarovaya müraciətindən sonra spiker siyasi partiyaların təklifini dəstəkləyərək yeni qanun layihəsinin hazırlanması haqqında tapşırıq verdi. İctimai birliklər və dini qurumlar, Hüquq siyasəti və dövlət quruculuğu və İnsan hüquqları komitələri tərəfindən qanun layihəsinin hazırlanması prosesi başlandı.

Deputat vurğulayıb ki, layihə hazırlanarkən dünyanın qabaqcıl ölkələrinin təcrübəsi öyrənildi, ölkənin siyasi sisteminin və milli xüsusiyyətlərinin, bununla yanaşı, Venesiya Komissiyasının siyasi partiyaların fəaliyyətinin tənzimlənməsi haqqında tövsiyələri nəzərə alındı:

"Milli Məclis ölkədə fəaliyyət göstərən siyasi partiyalara müraciət etdi və 47 siyasi partiyadan 250-dən çox təklif daxil oldu. Bütün bunlar ümumiləşdiriləndən sonra qanun layihəsi geniş ictimaiyyətin müzakirəsinə təqdim olundu. Sonra qanun layihəsi ilə bağlı siyasi partiya təmsilçilərinin və Qeyri-Hökumət Təşkilatlarının nümayəndələrinin iştirakı ilə geniş dinləmələr və müzakirələr keçirildi. Aparılan müzakirələrdə səslənən fikirlər, irəli sürülən təkliflər nəzərə alınmaqla, qanun layihəsi üzərində iş davam etdirildi və sənəd yenilənmiş variantda müzakirəyə çıxarıldı. Milli Məclisin plenar iclasına tövsiyyə olunan qanun layihəsi 66 dəyişiklikdən və 3-cü oxunuşdan sonra qəbul edildi. Düşünürəm ki, "Siyasi partiyalar haqqında" yeni qanun bütün siyasi cameəni qane edən, müasir standartlara cavab verən bir sənəddir".

Aysel Yusifqızı

Telegramda izləyin