Polis şöbəsində halı pisləşib ölən şəxs özünü vəkil kimi tanıdıbmış

Yanvarın 19-da axşam saatlarında Kürdəmir Rayon Polis Şöbəsində halı pisləşən və xəstəxanada vəfat edən şəxslə bağlı bəzi məqamlar üzə çıxıb.

Sonxeber.az qafqazinfo-ya istinadən xəbər verir ki, Cinayət Məcəlləsinin 178-ci (Dələduzluq) maddəsi ilə şübhəli bilinən 1968-ci il təvəllüdlü Oktay Əliyev özünü vəkil kimi təqdim edibmiş.

Belə ki, bir müddət əvvəl Kürdəmir sakini həbsdə olan qohumunun azadlığa çıxarılması üçün vəkil axtarışına çıxıb və Bakıda Oktay Əliyevlə tanış olub. O.Əliyev ona həmin şəxsi məhkəmə vasitəsi ilə azadlığa buraxdıracağına söz verib və bunun müqabilində 38 min manat alıb.

Özünü vəkil kimi təqdim edən, əslində isə Vəkillər Kollegiyasının üzvü olmayan şəxs həmin vəsaiti Bakıdan Kürdəmirə gedərək Dördyol adlanan ərazidə alıb. Lakin xeyli vaxt keçsə də, o, vədinə əməl etməyib. Bundan sonra pulu verən tərəf O.Əliyevdən polisə şikayət edib və onun barəsində cinayət işi açılıb.

Dünən isə polisin çağırışı əsasında O.Əliyev Bakıdan Kürdəmirə gedib. Vəkilinin iştirakı ilə aparılan dindirilmə zamanı onun təzyiqi yüksəlib. Dərhal təcili tibbi yardım briqadası çağırılıb və O.Əliyev xəstəxanaya çatdırılıb. Tibbi müdaxiləyə baxmayaraq O.Əliyev orada vəfat edib.

Faktla bağlı araşdırma aparılır.

Telegramda izləyin