Paşinyan Putin və Mişustini Rusiya Günü münasibətilə təbrik edib

Ermənistanın Baş naziri Nikol Paşinyan Rusiya prezidenti Vladimir Putini və Baş nazir Mixail Mişustini Rusiya Günü münasibətilə təbrik edib.

Sonxeber.az xəbər verir ki bu barədə erməni mətbuatı məlumat yayıb.

"Sizi və bütün rusiyalıları bu mənalı gün, Rusiya xalqının dövlətçiliyin mənşəyinə dərin sədaqətini vurğulayan Rusiya Günü münasibətilə ürəkdən təbrik edirəm. Ermənistan və Rusiyanın tarixən zəngin və zamanın sınağından çıxmış müttəfiqlik münasibətləri son otuz il ərzində yeni keyfiyyət səviyyəsinə yüksəlib. Regional və beynəlxalq gündəlikdəki məsələlərlə bağlı ölkələrimizin fəal və səmərəli tərəfdaşlığı xalqlarımız arasında qarşılıqlı hörmətə əsaslanan və bir-birinin maraqlarını nəzərə alan qarşılıqlı faydalı münasibətləri dərinləşdirmək üçün ümumi niyyətimizi vurğulayır. Əminəm ki, Ermənistan və Rusiya ardıcıl olaraq konstruktiv əlaqələri inkişaf etdirməklə, müxtəlif sektorlarda, o cümlədən Cənubi Qafqazda təhlükəsizlik və sabitliyin təmin edilməsi məqsədilə əməkdaşlığı davamlı şəkildə inkişaf etdirəcəklər", - deyə Paşinyan Putinə məktubunda bildirib.

"Ermənistanla Rusiya arasında münasibətlər tarixin dərinliklərindən qaynaqlanır. Ermənistan-Rusiya müttəfiqlik münasibətlərinin mütərəqqi inkişafını təmin etmək, o cümlədən xalqlarımızın mənafeyi naminə qarşılıqlı faydalı, perspektivli layihələri həyata keçirmək yolu ilə davam etdirmək üçün miras qalmış möhkəm dostluğu və qardaşlığı qoruyub saxlamaq bizim sarsılmaz borcumuzdur", - deyə Paşinyan Mişustinə məktub ünvanlayıb.

Şəbnəm Lətifi

Telegramda izləyin