Şahramanyanın imzaladığı sənədin hər hansı rolu, əhəmiyyəti və məzmunu yoxdur - ŞƏRH

"2023-cü il sentyabrın 28-də qondarma "Artsax" rejiminin özünü lider kimi təqdim edən Samvel Şahramanyan tərəfindən imzalanmış sənədin Azərbaycanın ərazi bütövlüyü və suverenliyinin bərpa olunması tarixində heç bir əhəmiyyəti, dəyəri və məzmunu yoxdur. Çünki Şahramanyan həmin sənədi imzalayana qədər artıq Qarabağdakı separatçı qurumun xarici aləmlə bütün əlaqələri kəsilmişdi. Onların böyük bir hissəsi məhv edilmiş, keçmiş Dağlıq Qarabağın ətrafındakı rayonlar azad edilmişdi".
Bunu Sonxeber.az-a açıqlamasında siyasi şərhçi Aydın Quliyev bildirib.

O, bildirib ki, yalnız Xankəndi və onun ətrafındakı bəzi yaşayış məntəqələrində separatçı qurumun qanunsuz silahlı dəstələri və Ermənistan ordusunun bəzi qüvvələri mövcud idi, onlar da çarəsiz vəziyyətdə idilər:

"Belə bir şəraitdə Şahramanyanın həmin sənədi imzalaması Azərbaycanın ərazi bütövlüyünün və suverenliyinin tanınması və ya bərpa olunması anlamına gəlmirdi. Bu, Şahramanyanın və onun ətrafındakı dəstənin təslim olmasının göstəricisi idi. Sentyabrın 28-də Şahramanyanın imzaladığı sənəd separatçı rejimin qəti şəkildə təslim olmasının əlaməti, separatçı və qanunsuz silah daşıyan şəxslərin ağ bayraq qaldırması demək idi. Bu hadisənin Azərbaycanın ərazi bütövlüyü və suverenliyinin bərpası ilə nə tarixi, nə siyasi, nə də hüquqi baxımdan bağlılığı var".

Onun sözlərinə görə, Azərbaycanın suverenliyinin və ərazi bütövlüyünün bərpası tarixində bütün dünyanın gördüyü, eşitdiyi və qəbul etdiyi bir sıra faktlar var:

"Bunlara 2020-ci il noyabrın 8-də imzalanmış bəyanat, separatçı rejimin və işğalçı qüvvələrin işğal olunmuş rayonlardan tam şəkildə çıxarılması, Rusiyanın sülhməramlı qüvvələrinin Azərbaycanı tərk etməsi və Paşinyanın 2022-ci ilin oktyabrında Qarabağı Azərbaycanın tərkib hissəsi kimi tanıması daxildir. Azərbaycanın suverenliyinin və ərazi bütövlüyünün bərpası uğrunda mübarizə tarixində yadda qalacaq əsas elementlər bunlardır. Şahramanyanın imzaladığı sənədin isə bu sırada hər hansı rolu, əhəmiyyəti və məzmunu yoxdur".

Röyalə Xəyal

Telegramda izləyin