Məktəblərin iş dəftəri problemi: Müəllim valideyndən iş dəftərini almağı tələb edə bilə?

Yeni tədris ili ilə birlikdə məktəblərdə şagirdlər üçün müxtəlif iş dəftərlərinin alınması məsələsi də gündəmə gəlir. Bəzi hallarda valideynlərdən konkret nəşriyyatın və ya müəllimin tövsiyə etdiyi iş dəftərini almağın tələb edildiyi bildirilir. Halbuki iş dəftərlərinin istifadəsi ilə bağlı rəsmi izahlarda onların könüllülük prinsipi əsasında əldə olunmalı olduğu qeyd edilib. Bu isə məktəb və müəllimlərin valideynlər qarşısında belə bir tələbi irəli sürmək səlahiyyətinin olub-olmaması məsələsini aktuallaşdırır.

Bəs, məktəb və ya müəllim valideyndən konkret iş dəftərini almağı tələb edə bilərmi və belə bir tələb hansı hallarda qanuni hesab olunur?
Mövzu ilə bağlı Sonxeber.az-a açıqlama verən təhsil eksperti Məzahir Məmmədli bildirib ki, məktəblərdə iş dəftərlərindən istifadə ilə bağlı vahid qayda yoxdur.

"Bəzi məktəblərdə və müəllimlərdə iş dəftərlərinin istifadəsi təklif olunur, bəzilərində isə buna ehtiyac duyulmur. İş dəftərləri yardımçı vəsait kimi istifadə edilir. Bəzi müəllimlər, xüsusilə ənənəvi təhsil yanaşmasından gələnlər, iş dəftərlərinin tətbiqini vacib hesab edirlər. Digər müəllimlər isə bu cür vəsaitlərdən istifadəyə üstünlük vermirlər. Bəzi hallarda isə iş dəftərinin alınması tələb kimi qoyulur. Ümumiyyətlə, bu məsələnin vahid mərkəzdən idarə olunması sistemi yoxdur. Qanunvericilik və normativ-hüquqi aktlarda məktəblərdə iş dəftərinin mütləq olması ilə bağlı tələb nəzərdə tutulmayıb. Bəzi valideynlər şagirdlərin mövzunu daha asan mənimsəməsi üçün özləri iş dəftərlərindən istifadədə maraqlı olurlar. Bəzi hallarda isə müəllimlər və sinif rəhbərləri buna üstünlük verirlər".

Ekspert bildirib ki, bu məsələ müəyyən mənada təlimat və qanunlardakı boşluqdan irəli gəlir:

"Mövcud qaydalarda nə iş dəftərinin istifadəsinə konkret qadağa qoyulur, nə də onun məcburi olması tələb edilir. Bu səbəbdən məsələ müəllimin yanaşmasından və metodikasından asılı olaraq dəyişir. Konkret olaraq iş dəftərinin məcburi alınması ilə bağlı hər hansı tapşırıq və ya icra tələbi yoxdur. Buna görə də müəllimlər iş dəftərinin mütləq alınmasını şagirdlər qarşısında şərt və ya tələb kimi qoya bilməzlər. Lakin müəllimin metodik yanaşması və ya valideynin istəyi əsasında iş dəftərindən istifadə etmək mümkündür".

Röyalə Xəyal

Telegramda izləyin