"3+3" formatında görüşün ciddi nəticələrə nail olduğunu söyləmək çətindir" - Politoloq

Tehranda Azərbaycan,İran,Türkiyə,Ermənistan,Rusiya xarici işlər nazirlərinin iştirakı ilə "3+3" formatında görüş keçirilib.

Politoloq Qabil Hüseynli Sonxeber.az-a bildirib ki, görüşün ciddi nəticələrə nail olduğunu söyləmək çətindir.

O bildirib ki,Qərb ölkələri İran və Rusiyanın regionda münsif kimi iştirak etməsini istəmirlər:

"3+3" formatı hələki Gürcüstansız işləyir. Gürcüstan bu formata qoşulmaqdan yenə də imtina etdi. Ermənistanın orada iştirakı sırf formal xarakter daşıyır. Çünki Ermənistan sülhyaratma prosesinin Qərbin əli ilə həyata keçirilməsini istəyir. Amma İranla münasibətlərinin pozulmaması üçün bu görüşdə iştirak edir. Hələki bu format Tehranda 2-ci iclasını keçirirdi. Əsəsən regional problemlərin həlli gözlənilirdi. Qərb ölkələri İranın regional proseslərdə münsif kimi iştirak etməsini istəmirlər. Onun sülhyaratma prosesinə qatılması Qərb tərəfindən normal qarşılanmır. Rusiyanın da təcrid edilməsi siyasətini yürüdən Qərb Rusiyanın da iştirakını normal hesab etmir. Bu toplantının ciddi nəticələrə nail olduğunu söyləmək çətindir. Görünür, Gürcüstansız da "3+3" deyil, "2+3" formatında görüşün həyata keçirilməsini təmin edəcəklər. Gürcüstan mövqeyini şərh edib ki, ərazini işğal edən dövlətin iştirakı olan toplantıda təmsil olunmayacaq. Amma Gürcüstan Qafqaz ideyasına, Azərbaycan, Ermənistan, Gürcüstanın iştirakı ilə bölgənin problemlərinin həllinə razıdır".

Qeyd edək ki, Tehranda "3+3" formatında danışıqların yekunu üzrə xarici işlər nazirləri münaqişələrin sülh yolu ilə həllinin vacibliyini vurğulayaraq, növbəti görüşün Türkiyədə keçirilməsi barədə razılığa gəliblər.

Şəbnəm Lətifi

Telegramda izləyin