"30 il ərzində 1 milyon qaçqınla maraqlanmayan bir qurumun qəbul etdiyi qərarlar Azərbaycan üçün əhəmiyyətli deyil" - POLİTOLOQ

Məlum olduğu kimi, Azərbaycan nümayəndə heyəti ölkəyə qarşı ikili standartlara etiraz olaraq AŞPA ilə əməkdaşlığı dayandırır. Bəyanatda bildirilib ki, AŞPA-da mövcud olan dözülməz irqçilik, Azərbaycanofobiya və İslamofobiya mühiti fonunda Azərbaycan nümayəndə heyəti AŞPA ilə əməkdaşlığı və təşkilatda iştirakını qeyri-müəyyən müddətə dayandırmaq qərarına gəlib.

Məsələ ilə bağlı politoloq Turab Rzayev Sonxeber.az-a açıqlamasında bildirib ki, bütün bunlar gözlənilən idi. Çünki artıq uzun müddətdir ki, AŞPA ilə Azərbaycan Respublikası arasında münasibətlər həddindən artıq gərginləşmişdir.

"AŞPA-nın 30 il ərzində Azərbaycana göstərdiyi münasibət heç də, ürək açan deyildi. Bunun daha əvvəllər hansı şəkildə əməkdaşlıq forması adlandırmaq olardı. Bəzi münasibətlər soyuq, bəzən isti. Ancaq bir müddət sonra, xüsusilə 44 günlük müharibədən sonra münasibətlər həddindən artıq gərginləşmişdir. 44 günlük müharibə ərəfəsində, sonra isə hər dəfə AŞPA Azərbaycan əleyhinə qərar qəbul edirdi. Gah Qarabağdakı erməni abidələri, gah da erməni sakinləri, Azərbaycanın guya Ermənistana ərazi iddiası ilə bağlı bütün qərarlar yekdilliklə Ermənistanın lehinə səs verməklə bəyanatlar qəbul olunurdu. Əlbəttə ki, bu Azərbaycan tərəfi üçün dözülməz haldır.

Politoloqun sözlərinə görə sözügedən qurum 30 il ərzində 1 milyon qaçqının taleyi ilə maraqlanmayıblar.

"Heç bir qətnamə və qərar qəbul edilməyib. Azərbaycanın dağılan abidələri ilə bağlı bir dəfə diqqət çəkən missiya ortaya qoyulmayıb. Ancaq indi 44 günlük müharibə ərəfəsində bu qədər ermənipərəst mövqenin sərgilənməsi, ermənilərin məcburi köçürülməsi məsələsi, erməni abidələrinin dağıdılması ilə bağlı səsləndirilən fikirlər Azərbaycan nümayəndə heyətində və Azərbaycan Respublikasında sərtləşmə yaradacağı bəlli idi. Ancaq burada ikitərəfli nüans var ki, AŞPA burada əhəmiyyətli bir qurum deyil. Bu qurumun hansısa qərar verməsi və yerinə yetirməsi kimi məsələlər çox da əhəmiyyətli deyil. Çünki AŞPA daha çox məşvərətçi bir qurumdur. Daha çox məsləhət verməklə məşğuldur.

Turab Rzayev deyib ki, Avropa İttifaqının siyasi fəaliyyətini, siyasi kursunu Avropa İttifaqı Nazirlər Kabineti və Avropa İttifaqı Şurası həyata keçirir.

"AŞPA-nın isə belə bir rolu yoxdur. Onlar sadəcə məsləhət verə bilərlər. Bu baxımdan onların qərarları Azərbaycan üçün çox da ciddi sayılmaya bilər. Düzdür, burada tədbirlərdə iştirak etməmək kimi məsələlər çox ciddidir. Azərbaycanın siyasi kursunda bir dəyişiklik sayıla biləcək məsələlər ola bilər. Ancaq özlüyündə bu qurum keçmiş siyasətçilərin, keçmiş dövlət başçılarının, deputatlarının yığışdığı siyasi qurum idi. Eyni zamanda paralel olaraq Avropa İttifaqından belə Azərbaycan əleyhinə açıqlamaların gəldiyini gördük. Cozef Borel Azərbaycan əleyhinə çıxış edərək bildirmişdi ki, guya Azərbaycanın Ermənistana qarşı ərazi iddiaları var və hücuma hazırlaşır. Nəzərə almaq lazımdır ki bu çox ciddi bir siqnaldır. Bu AŞPA və Avropa İttifaqının Azərbaycana qarşı siyasi təzyiq başlatdığının göstəricisidir. Onlar hansısa bir siyasi nailiyyətə təzyiq vasitəsilə çatmaq istədiklərini göstərir".

Telegramda izləyin