Şəhid ailələri və qazilər üçün ictimai nəqliyyat PULSUZ OLUR? - AÇIQLAMA

Bu gün təklif olunan məsələlərdən biri də qazi və şəhid ailələrin ictimai nəqliyyatdan pulsuz istifadə etməsidir. Şəhid və qazi ailələri ictimai nəqliyyatdan pulsuz istifadə edə bilərmi?

Bununla bağlı Sonxeber.az-a danışan deputat Cavanşir Paşazadə bildirib ki, bununla bağlı bir neçə dəfə təkliflər səsləndirilib:

"Bu gün əldə etdiyimiz möhtəşəm zəfərləri Ali Baş Komandana və Azərbaycanın mərd oğullarına borcluyuq. Şəhid və qazi ailələri üçün ictimai nəqliyyatın pulsuz olması ciddi məsələdir və bu məsələni yenidən gündəmə gətirərək müzakirə etmək olar. Bununla bağlı ilk olaraq konkret siyahı hazırlanmaldır və elə sistem yaratmalıyıq ki, bütün regionlar üçün də keçərli olsun. Düşünürəm ki, ictimai nəqliyyatın pulsuz olması qazi və şəhid ailələri üçün də dəstək olar. Çünki ay ərzində ictimai nəqliyyata xərclənən pulu hesablayanda kifayyət qədər böyük məbləğ edir. Əlbəttə, burada datasiya məsələsi ortaya çıxır. Amma istənilən halda bununla bağlı müvafiq dövlət qurumlarının öz təkliflərini verməsi vacibdir".

Deputat vurğulayıb ki, bu gün daha çox diqqət göstərilən kateqoriya şəhid ailələri və qazilərimizdir.

"Dövlət bunun üçün lazım olan bütün addımları atır. Bu gün şəhid ailələri, müharibə veteranlarına və qazilərə dövlətin maddi dəstəyi ilə yanaşı, mənəvi dəstəyi də ən yüksək səviyyədədir. Dövlət tərəfindən şəhid və qazi ailələrin sosial vəziyyəti daim nəzarətdə saxlanılır. Bilirsiniz ki, cənab Prezident İlham Əliyev və Birinci vitse-prezident Mehriban xanim Əliyeva tez-tez şəhid ailələri, müharibə iştirakçıları, müharibə əlilləri ilə daim görüşür, onların sosial problemləri ilə maraqlanırlar.Xüsusilə İkinci Qarabağ müharibəsindən sonra bu həssas kateqoriyadan olan vətəndaşlarımızın işlə təmin edilməsi üçün Əmək və Əhalinin Sosial Müdafiəsi Nazirliyinə cənab Prezident tərəfindən göstəriş verilib. Onların müalicəsi ən yüksək səviyyədə həyata keçirilir. Müharibə zamanı əlini, qolunu, ayağını itirmiş qazilərimiz ən müasir protezlərlə təmin olunurlar. Ölkəmizdə müalicəsi mümkün olmayan qazilərimiz dövlətimiz tərəfindən digər ölkələrdə müalicə olunaraq Vətənə qayıdırlar.

Düşünürəm ki, bu həssas kateqoriyadan olan vətəndaşlarımıza göstərilən diqqət və qayğı günbəgün artırılacaq. Çünki biz bugünkü möhtəşəm qələbə sevincini şəhidlərimizə və ərazi bütövlüyümüz uğrunda sağlamlıqlarını itirən qazilərimizə borcluyuq. Məhz onların sayəsində biz 30 ildir ki, həsrətində olduğumuz Xankəndimizdə, Şuşamızda və digər işğaldan azad olunan torpaqlarımızda şanlı üçrəngli bayrağımız dalğalanır".

Telegramda izləyin