Kamil Zeynallı Ermənistana təhvil verilə bilər? - AÇIQLAMA

Tanınmış idmançı Kamil Zeynallı Rusiyada saxlanılıb. Kamil Zeynallı Ermənistan tərəfindən beynəlxalq axtarışa verildiyini və onların tələbi ilə saxlanıldığını bildirib. İdmançı Rusiya tərəfindən Ermənistana təhvil veriləcəyini deyib. Bəs Kamil Zeynallı Ermənistana təhvil verilə bilərmi?

Məsələ ilə bağlı vəkil Turan Abdullazadə Sonxeber.az-a açıqlama verib.

Vəkil məsələyə aydınlıq gətirib:

"BMT Baş Məclisinin 10 dekabr 1984-cü il tarixli 39/46 saylı qətnaməsi ilə qəbul edilmiş "İşgəncələr və digər qəddar, qeyri-insani, yaxud ləyaqəti alçaldan davranış və cəza növlərinə qarşı konvensiya"ya əsasən, iştirakçı dövlət hər hansı şəxsi işgəncə veriləcəyini ehtimal etməyə ciddi əsaslar olan başqa bir dövlətə sürgün etməməli, qaytarmamalı və ya təhvil verməməlidir. Həmin Konvensiyanı ratifikasiya etməmək dövlətləri beynəlxalq sferada öhdəliklərdən və məsuliyyətdən azad etmir

3-cü maddədə iştirakçı dövlətlərin üzərinə heç bir şəxsi ona işgəncə veriləcəyini ehtimal etməyə ciddi əsaslar mövcud olduğu halda başqa bir dövlətə sürgün etməmək, qaytarmamaq və ya ekstradisiya etməmək kimi öhdəliklər qoyur.

İşgəncə insan hüquqlarının ciddi zorakı pozuntusudur və beynəlxalq hüquqla qəti şəkildə qadağan olunur. İşgəncənin qadağan olunması çox sayda beynəlxalq sənədlərdə və humanitar sazişlərdə öz əksini tapmışdır".

Vəkil bildirib ki, Kamil Zeynallı Rusiya Federasiyası tərəfindən Ermənistana təhvil verilərsə orada işgəncəyə məruz qalması ehtimalı olduqca çoxdur:

"Aydın məsələdir ki, Kamil Zeynallı Rusiya Federasiyası tərəfindən Ermənistana təhvil verilərsə orada işgəncəyə məruz qalması ehtimalı olduqca çoxdur. Çünki II Qarabağ müharibəsində həmin bloqer olduqca aktiv idi və Ermənistan əleyhinə şüarlar səsləndirirdi.

Rusiya ilə Ermənistan arasında cinayət işləri üzrə ekstradisiya, hüquqi yardım və hüquqi münasibətlər haqqında müqavilə olsa belə hazırki vəziyyətdə həmin şəxsin Ermənistana verilməsi hüquqa uyğun hesab etmirəm. Belə ki, işgəncəyə məruz qalma ehtimalı olan şəxsin həmin dövlətə verilməsinin özü beynəlxalq hüquqa daban-dabana zidd bir addımdır."

Gülcahan Məmmədova

Telegramda izləyin