"Xocalı soyqırımı XX əsrin ən dəhşətli cinayətlərindən biridir" - DEPUTAT

"Xocalı soyqırımı XX əsrin ən dəhşətli cinayətlərindən biridir".

Bunu Sonxeber.az-a danışan deputat Cavanşir Paşazadə bildirib.

Deputat qeyd edib ki, 32 il bundan əvvəl 1992-ci il fevralın 25-dən 26-a keçən gecə erməni quldur dəstələri keçmiş Sovet Ordusunun 366-cı alayının birbaşa iştirakı ilə Xocalıda soydaşlarımıza divan tutdular:

"106 qadın, 63 uşaq və 70 yaşlı insan olmaqla 613 nəfər xüsusi qəddarlıqla qətlə yetirildi, 1275 sakin girov götürüldü, 150 nəfərin taleyi isə bu günədək naməlumdur. Xocalı soyqırımı kütləvi insan qırğınına görə tarixin dəhşətli faciələri ilə bir sırada dayanır.Xalqımız Xocalı soyqırımını heç vaxt unutdurmayacaq. Soydaşlarımıza qarşı bu vəhşiliyi törətmiş erməni barbarları xalqımız və bəşəriyyət qarşısında cavab verəcək. Bir neçə gün əvvəl Xocalıda tapılan kütləvi məzarlıq və əl-ayaqları bağlı uşaq və qadınlara aid qalıqlar erməni vandallarının xalqımıza qarşı törətdiyi vəhşiliklərin sadəcə bir hissəsidir. Xocalı faciəsi qurbanları da daxil olmaqla bütün şəhidlərimizin qisası alınıb. Ali Baş Komandan İlham Əliyevin rəhbərliyi ilə 44 günlük Vətən müharibəsində Azərbaycanın Müzəffər Ordusu bütün şəhidlərimizin qisasını alaraq ərazi bütövlüyümüzü bərpa etdi".

Deputat vurğulayıb ki, Xocalı soyqırımın törədilməsində tək ermənilər deyil, o dövrdə Azərbaycanda hakimiyyətdə olan şəxslərdə məsuliyyət daşıyırlar:

"90-cı illərin əvvəllərində hakimiyyətdə olan AXCP-müsavat cütlüyünün başı hakimiyyət davasına qarışmışdı. Dövlətin və xalqın təhlükəsizliyi onları maraqlandırmırdı. Əgər xalqın istəyi ilə ulu öndər Heydər Əliyev yenidən hakimiyyətə qayıtmasaydı Azərbaycan yenidən başqa ölkənin himayəsinə keçəcəkdir

Xocalı soyqırımına ilk dəfə hüquqi qiymət də məhz ümummilli lider Heydər Əliyev tərəfindən verilib. 1994-cü il fevralın 24-də ulu öndərin imzaladığı fərmanla həmin gün xalqımıza qarşı törədilən soyqırımı aktı kimi qeyd edilməyə başlandı. Xocalı hadisələrini həm faciə, həm də xalqımızın qəhrəmanlıq salnaməsi adlandıran Heydər Əliyev şəhərin müdafiəçilərinin xidmətləri ilə bağlı sərəncam da imzaladı. Soyqırımın ildönümündə xocalılılarla görüşündə isə ulu öndər Heydər Əliyev bu hadisəni əsrin ən dəhşətli faciəsi adlandırdı.

Ümummilli liderin səyi ilə faciə lokal məkandan çıxaraq beynəlxalq səviyyədə tanınmağa başlandı. Xocalı soyqırımı ilə bağlı dünya ictimaiyyəti yetərincə məlumat əldə etdi. Xaricdə yaşayan soydaşlarımız bu işə cəlb olundu. Nəticədə isə erməni təcavüzü, onun işğalçılıq siyasəti, Azərbaycan xalqına qarşı törətdiyi vəhşilik, bir sözlə, o günə qədər dünyaya naməlum qalan çox həqiqətlərin üstünə işıq salındı. Xocalı soyqırımını dünyada 9 ölkə və ABŞ-ın 21 ştatı tam və ya parlament səviyyəsində qətliam kimi tanıyıb. Təbii ki, Xocalı soyqırımının dünyada tanınmasında cənab prezident İlham Əliyev və Birinci Vitse-prezident Mehriban xanım Əliyevanın müstəsna xidmətləri olub. Həmçinin Xocalı soyqırımının bütün dünyada tanınmasında Heydər Əliyev Fondunun Vitse-prezidenti Leyla xanım Əliyevanın "Xocalıya ədalət" kampaniyasının mühüm rolu var. 2008-ci ildən başlanılan "Xocalıya ədalət" beynəlxalq kampaniyasının əhəmiyyəti böyükdür. Belə ki, kampaniya çərçivəsində Xocalı soyqırımı ilə bağlı beynəlxalq səviyyədə məqsədyönlü təbliğat tədbirləri həyata keçirilir, Azərbaycanın haqq səsi dünyaya çatdırılır. Allahdan Xocalıda qətlə yetirilən şəhidlərimizə rəhmət diləyirəm".

Telegramda izləyin