Ayda Yerin doğuşunu lentə alan astronavt faciəvi şəkildə həlak oldu

"Apollo-8" kosmik gəmisində Ayın ətrafında uçuş edərək kosmosda ən məşhur fotoşəkillərdən birini çəkən amerikalı astronavt Uilyam Anders 90 yaşında təyyarə idarə edərkən faciəvi şəkildə həyatını itirib.

Rəsmi məlumata görə, onun təyyarəsi Vaşinqton ştatının Sietl şəhərindən şimalda suya çırpılıb.

Qeyd edək ki, Anders Aya çatan ilk ekipajlı kosmik gəmi olan "Apollo 8" missiyasının (1968) Ay modulunun pilotu idi. O, planetimizin kosmosdan çəkilmiş ən məşhur görüntülərindən biri olan "Yer kürəsi" adlı ikonik fotoşəkilin müəllifi idi.

Foto Milad ərəfəsində çəkilib. O, Yerin Ay səthinin üfüqündən yuxarı qalxmasını təsvir edir.

Anders daha sonra bu fotonu kosmik proqrama verdiyi ən mühüm töhfə adlandırırdı:

"Biz bütün bu yolu Ayı araşdırmaq üçün gəldik, kəşf etdiyimiz ən vacib şey isə Yer oldu".

Çoxları hesab edirlər ki, bu görüntü qlobal ekoloji hərəkata təkan verib və ümumdünya Yer Günü kampaniyasının əsasını qoyub.(oxu.az)

Telegramda izləyin