Borca görə ata və oğulu öldürən cinayətkar: "Qərəzli olmayın" - VİDEO

Türkiyənin Adana şəhərində 40 milyon lirəlik borc mübahisəsi qanlı cinayətlə nəticələnib. Hadisə zamanı təqaüdçü polis əməkdaşı Aytekin Fil və oğlu Sinan Fil öldürülüb, Neslihan Fil isə yaralanıb. Cinayətdə şübhəli bilinən Mehmet Nuri Ataş saxlanılaraq məhkəmə qərarı ilə həbs edilib.

Sonxeber.az xarici mediaya istinadla xəbər verir ki, hadisə Çukurova rayonunun Belediye Evleri məhəlləsi, Turgut Özal bulvarında saat 17:30 radələrində baş verib. İddiaya görə, tikinti işi ilə məşğul olan 46 yaşlı Mehmet Nuri Ataş 40 milyon lirəlik borc mübahisəsinə görə aralarında ədavət yaranan ortağı, 53 yaşlı təqaüdçü polis əməkdaşı Aytekin Filin iş yerinə gedib.

Burada tərəflər arasında başlayan mübahisə qısa müddətdə davaya çevrilib. Ataş əvvəlcə Aytekin Filə və onun həyat yoldaşı 48 yaşlı Neslihan Filə atəş açaraq hadisə yerindən qaçıb.

Bu zaman cütlüyün 30 yaşlı oğlu Sinan Fil şübhəlini yaxalamaq üçün onun avtomobilinə minib. Lakin yaranan qarşıdurma zamanı Ataş Sinan Fili də başından güllələyib.

Şübhəli daha sonra ağır yaralanan Sinan Filin olduğu avtomobillə təxminən 5 kilometr hərəkət edib. Seyhan rayonunun Gürselpaşa məhəlləsinə çatdıqdan sonra avtomobili küçənin ortasında saxlayaraq piyada qaçıb.

Aytekin Fil aparıldığı xəstəxanada, oğlu Sinan Fil isə şübhəlinin avtomobilində həyatını itirib. Yaralanan Neslihan Fil xəstəxanada müalicə aldıqdan sonra evə buraxılıb.

Avtomobili qoyaraq qaçan Mehmet Nuri Ataş Cinayət Büro Şöbəsinin əməkdaşları tərəfindən qısa müddətdə gizləndiyi evdə saxlanılıb.

Həyatını itirən Aytekin Fil və oğlu Sinan Fil ötən gün Kabasakal qəbiristanlığında dəfn ediliblər.

Şübhəlinin polisə verdiyi ifadədə Aytekin Fil ilə ortaq tikinti işi gördüklərini və öz payına düşən 40 milyon lirənin ödənilmədiyini iddia etdiyi öyrənilib. Ataşın ifadəsində mübahisənin bu səbəbdən başladığını və atəş açdığını söylədiyi bildirilib.

Polisdəki əməliyyatların ardından məhkəməyə göndərilən Ataş jurnalistlərin suallarına cavab olaraq, "Hadisələri bilmədən qərəzli yanaşmayın. Buna dövlətin məhkəmələri qərar verəcək", - deyib.

Mehmet Nuri Ataş çıxarıldığı növbətçi məhkəmənin qərarı ilə tutularaq həbsxanaya göndərilib.

Telegramda izləyin