650-yə yaxın bal toplayan abituriyentlər bu səbəbdən KƏNARDA QALIR - AÇIQLAMA

Tibb ixtisasları üzrə təhsil haqqının azaldılması tələbələr və ailələr üçün maliyyə baxımından müsbət addım olsa da, tibbi təhsilin yüksək xərc tələb edən xüsusiyyətləri səbəbindən keyfiyyət məsələsi də gündəmə gəlir. Xüsusilə klinik təcrübə, laboratoriyalar, simulyasiya imkanları, müasir avadanlıq və təcrübəli müəllim heyətinin təmin olunması davamlı maliyyələşmə tələb edir. Ali təhsil müəssisələrinin qiymətləndirilməsində də maddi-texniki baza, kadr təminatı və təhsilin keyfiyyəti kimi göstəricilər nəzərə alınır.

Bəs, tibb ixtisasları üzrə təhsil haqlarının aşağı salınması universitetlərin maddi-texniki bazasına və tələbələrin praktiki hazırlığına təsir göstərə bilərmi, keyfiyyətin aşağı düşməsinin qarşısını almaq üçün dövlət və universitetlər tərəfindən hansı maliyyə və nəzarət mexanizmləri tətbiq olunmalıdır?
Mövzu ilə bağlı Sonxeber.az-a açıqlama verən təhsil eksperti Məzahir Məmmədli bildirib ki, ali təhsil müəssisələrinə qəbul hər il olduğu kimi, bu il də müəyyən çətinliklərlə müşayiət olundu. O cümlədən tibb ixtisası üzrə yüksək bal toplayan çoxsaylı abituriyentlər kənarda qaldı.

"Təxminən 60 nəfərin 600-dən artıq bal toplamasına baxmayaraq, bu ixtisasa qəbul ola bilmədiyi bildirilir. Bir tərəfdən, tibb Azərbaycanda əmək bazarında tələbatın olduğu sahələrdən biridir. Digər tərəfdən isə Azərbaycanda tibb təhsilinin yetərli olmadığını düşünən bəzi məzunlar əlavə təcrübə və rezidentura üçün Türkiyə, Almaniya və digər ölkələrə üz tuturlar. Bu isə onların bir hissəsinin sonradan Azərbaycana qayıtmaması və nəticədə beyin axınının güclənməsi riskini yaradır. Bu il Azərbaycan Tibb Universitetində bəzi ixtisaslar üzrə təhsil haqqının 1000 manat azaldılmasının təhsilin keyfiyyətinə ciddi təsir edəcəyini düşünmürəm. Hesab edirəm ki, əvvəlki illərdə müəyyənləşdirilən təhsil haqları Azərbaycan əmək bazarının və əhalinin maliyyə imkanlarının reallıqlarına tam uyğun deyildi. Bu il qiymətlər müəyyən qədər həmin imkanlara uyğunlaşdırılıb. Lakin ödənişli təhsil haqlarının hələ də 4000 manatdan yüksək olması, bəzi ixtisaslarda isə 5000 manata çatması aztəminatlı ailələr üçün ciddi maliyyə yüküdür".

Ekspert bildirib ki, xüsusilə 600, 635, hətta 650-yə yaxın bal toplayan abituriyentlərin maddi səbəblərdən və ya plan yerlərinin məhdudluğu səbəbindən tibb təhsilindən kənarda qalması ali təhsilə qəbul sistemi ilə bağlı problemdir:

"Bu məsələdə Dövlət İmtahan Mərkəzi tərəfindən daha geniş islahatların aparılmasına ehtiyac var. Bu il 600-dən artıq bal toplayaraq tibb ixtisasına qəbul ola bilməyən abituriyentlərə hərbi həkimlik və mühəndislik kimi digər istiqamətlər üzrə imkanların təklif edilməsi mütərəqqi addım sayıla bilər. Lakin bunun problemin tam həlli olmadığını düşünürəm. 700 bal üzərindən 600-dən artıq nəticə göstərən abituriyentin kifayət qədər yüksək hazırlığa malik olduğunu nəzərə almaq lazımdır. Belə abituriyentlərin sistemdən kənarda qalması həm onların xaricdə təhsil almağa yönəlməsinə, həm də gələcəkdə ölkəyə qayıtmamaq ehtimalının artmasına səbəb ola bilər. Bu isə uzunmüddətli perspektivdə beyin axınına, ailələr üçün əlavə iqtisadi yükə və ölkənin ixtisaslı kadrlara olan tələbatının ödənilməsində çətinliklərə gətirib çıxara bilər".

Onun sözlərinə görə, yüksək nəticə göstərən abituriyentlərin imkanlarından daha səmərəli istifadə olunması və onların ölkədə qalaraq təhsil almasına şərait yaradılması üçün qəbul sistemində daha fundamental dəyişikliklərə ehtiyac var.

Röyalə Xəyal

Telegramda izləyin